Read כֶּתֶר אֲרָם צוֹבָא - Tanah Aleppo Codex איכה 4 Bible Online

איכה 4 - כֶּתֶר אֲרָם צוֹבָא - Tanah Aleppo Codex bible

איכה 4

¹א איכה יועם זהב ישנא הכתם הטוב תשתפכנה אבני קדש בראש כל חוצות {ס}

²ב בני ציון היקרים המסלאים בפז--איכה נחשבו לנבלי חרש מעשה ידי יוצר {ס}

³ג גם תנין (תנים) חלצו שד היניקו גוריהן בת עמי לאכזר כי ענים (כיענים) במדבר {ס}

⁴ד דבק לשון יונק אל חכו בצמא עוללים שאלו לחם פרש אין להם {ס}

⁵ה האכלים למעדנים נשמו בחוצות האמנים עלי תולע חבקו אשפתות {ס}

⁶ו ויגדל עון בת עמי מחטאת סדם ההפוכה כמו רגע ולא חלו בה ידים {ס}

⁷ז זכו נזיריה משלג צחו מחלב אדמו עצם מפנינים ספיר גזרתם {ס}

⁸ח חשך משחור תארם לא נכרו בחוצות צפד עורם על עצמם יבש היה כעץ {ס}

⁹ט טובים היו חללי חרב מחללי רעב שהם יזבו מדקרים מתנובת שדי {ס}

¹⁰י ידי נשים רחמניות--בשלו ילדיהן היו לברות למו בשבר בת עמי {ס}

¹¹יא כלה יהוה את חמתו שפך חרון אפו ויצת אש בציון ותאכל יסדתיה {ס}

¹²יב לא האמינו מלכי ארץ וכל (כל) ישבי תבל כי יבא צר ואויב בשערי ירושלם {ס}

¹³יג מחטאות נביאיה עונת כהניה השפכים בקרבה דם צדיקים {ס}

¹⁴יד נעו עורים בחוצות נגאלו בדם בלא יוכלו יגעו בלבשיהם {ס}

¹⁵טו סורו טמא קראו למו סורו סורו אל תגעו--כי נצו גם נעו אמרו בגוים לא יוספו לגור {ס}

¹⁶טז פני יהוה חלקם לא יוסיף להביטם פני כהנים לא נשאו זקנים (וזקנים) לא חננו {ס}

¹⁷יז עודינה (עודינו) תכלינה עינינו אל עזרתנו הבל בצפיתנו צפינו אל גוי לא יושע {ס}

¹⁸יח צדו צעדינו מלכת ברחבתינו קרב קצנו מלאו ימינו כי בא קצנו {ס}

¹⁹יט קלים היו רדפינו מנשרי שמים על ההרים דלקנו במדבר ארבו לנו {ס}

²⁰כ רוח אפינו משיח יהוה נלכד בשחיתותם אשר אמרנו בצלו נחיה בגוים {ס}

²¹כא שישי ושמחי בת אדום יושבתי (יושבת) בארץ עוץ גם עליך תעבר כוס--תשכרי ותתערי {ס}

²²כב תם עונך בת ציון--לא יוסיף להגלותך פקד עונך בת אדום גלה על חטאתיך {פ}