Read כֶּתֶר אֲרָם צוֹבָא - Tanah Aleppo Codex יחזקאל 10 Bible Online

יחזקאל 10 - כֶּתֶר אֲרָם צוֹבָא - Tanah Aleppo Codex bible

יחזקאל 10

¹א ואראה והנה אל הרקיע אשר על ראש הכרבים כאבן ספיר כמראה דמות כסא--נראה עליהם

²ב ויאמר אל האיש לבש הבדים ויאמר בא אל בינות לגלגל אל תחת לכרוב ומלא חפניך גחלי אש מבינות לכרבים וזרק על העיר ויבא לעיני

³ג והכרבים עמדים מימין לבית--בבאו האיש והענן מלא את החצר הפנימית

⁴ד וירם כבוד יהוה מעל הכרוב על מפתן הבית וימלא הבית את הענן והחצר מלאה את נגה כבוד יהוה

⁵ה וקול כנפי הכרובים--נשמע עד החצר החיצנה כקול אל שדי בדברו

⁶ו ויהי בצותו את האיש לבש הבדים לאמר קח אש מבינות לגלגל מבינות לכרובים ויבא ויעמד אצל האופן

⁷ז וישלח הכרוב את ידו מבינות לכרובים אל האש אשר בינות הכרבים וישא ויתן אל חפני לבש הבדים ויקח ויצא

⁸ח וירא לכרבים--תבנית יד אדם תחת כנפיהם

⁹ט ואראה והנה ארבעה אופנים אצל הכרובים--אופן אחד אצל הכרוב אחד ואופן אחד אצל הכרוב אחד ומראה האופנים כעין אבן תרשיש

¹⁰י ומראיהם--דמות אחד לארבעתם כאשר יהיה האופן בתוך האופן

¹¹יא בלכתם אל ארבעת רבעיהם ילכו--לא יסבו בלכתם כי המקום אשר יפנה הראש אחריו ילכו--לא יסבו בלכתם

¹²יב וכל בשרם וגבהם וידיהם וכנפיהם--והאופנים מלאים עינים סביב לארבעתם אופניהם

¹³יג לאופנים--להם קורא הגלגל באזני

¹⁴יד וארבעה פנים לאחד פני האחד פני הכרוב ופני השני פני אדם והשלישי פני אריה והרביעי פני נשר

¹⁵טו וירמו הכרובים--היא החיה אשר ראיתי בנהר כבר

¹⁶טז ובלכת הכרובים ילכו האופנים אצלם ובשאת הכרובים את כנפיהם לרום מעל הארץ לא יסבו האופנים גם הם מאצלם

¹⁷יז בעמדם יעמדו וברומם ירומו אותם כי רוח החיה בהם

¹⁸יח ויצא כבוד יהוה מעל מפתן הבית ויעמד על הכרובים

¹⁹יט וישאו הכרובים את כנפיהם וירומו מן הארץ לעיני בצאתם והאופנים לעמתם ויעמד פתח שער בית יהוה הקדמוני וכבוד אלהי ישראל עליהם מלמעלה

²⁰כ היא החיה אשר ראיתי תחת אלהי ישראל--בנהר כבר ואדע כי כרובים המה

²¹כא ארבעה ארבעה פנים לאחד וארבע כנפים לאחד ודמות ידי אדם תחת כנפיהם

²²כב ודמות פניהם--המה הפנים אשר ראיתי על נהר כבר מראיהם ואותם איש אל עבר פניו ילכו