Read כֶּתֶר אֲרָם צוֹבָא - Tanah Aleppo Codex יחזקאל 16 Bible Online

יחזקאל 16 - כֶּתֶר אֲרָם צוֹבָא - Tanah Aleppo Codex bible

יחזקאל 16

¹א ויהי דבר יהוה אלי לאמר

²ב בן אדם הודע את ירושלם את תועבתיה

³ג ואמרת כה אמר אדני יהוה לירושלם מכרתיך ומלדתיך מארץ הכנעני אביך האמרי ואמך חתית

⁴ד ומולדותיך ביום הולדת אותך לא כרת שרך ובמים לא רחצת למשעי והמלח לא המלחת והחתל לא חתלת

⁵ה לא חסה עליך עין לעשות לך אחת מאלה--לחמלה עליך ותשלכי אל פני השדה בגעל נפשך ביום הלדת אתך

⁶ו ואעבר עליך ואראך מתבוססת בדמיך ואמר לך בדמיך חיי ואמר לך בדמיך חיי

⁷ז רבבה כצמח השדה נתתיך ותרבי ותגדלי ותבאי בעדי עדיים שדים נכנו ושערך צמח ואת ערם ועריה

⁸ח ואעבר עליך ואראך והנה עתך עת דדים ואפרש כנפי עליך ואכסה ערותך ואשבע לך ואבוא בברית אתך נאם אדני יהוה--ותהיי לי

⁹ט וארחצך במים ואשטף דמיך מעליך ואסכך בשמן

¹⁰י ואלבישך רקמה ואנעלך תחש ואחבשך בשש ואכסך משי

¹¹יא ואעדך עדי ואתנה צמידים על ידיך ורביד על גרונך

¹²יב ואתן נזם על אפך ועגילים על אזניך ועטרת תפארת בראשך

¹³יג ותעדי זהב וכסף ומלבושך ששי (שש) ומשי ורקמה סלת ודבש ושמן אכלתי (אכלת) ותיפי במאד מאד ותצלחי למלוכה

¹⁴יד ויצא לך שם בגוים ביפיך כי כליל הוא בהדרי אשר שמתי עליך--נאם אדני יהוה

¹⁵טו ותבטחי ביפיך ותזני על שמך ותשפכי את תזנותיך על כל עובר לו יהי

¹⁶טז ותקחי מבגדיך ותעשי לך במות טלאות ותזני עליהם לא באות ולא יהיה

¹⁷יז ותקחי כלי תפארתך מזהבי ומכספי אשר נתתי לך ותעשי לך צלמי זכר ותזני בם

¹⁸יח ותקחי את בגדי רקמתך ותכסים ושמני וקטרתי נתתי (נתת) לפניהם

¹⁹יט ולחמי אשר נתתי לך סלת ושמן ודבש האכלתיך ונתתיהו לפניהם לריח ניחח ויהי נאם אדני יהוה

²⁰כ ותקחי את בניך ואת בנותיך אשר ילדת לי ותזבחים להם לאכול--המעט מתזנותך (מתזנותיך)

²¹כא ותשחטי את בני ותתנים בהעביר אותם להם

²²כב ואת כל תועבתיך ותזנתיך לא זכרתי (זכרת) את ימי נעוריך--בהיותך עירם ועריה מתבוססת בדמך היית

²³כג ויהי אחרי כל רעתך אוי אוי לך נאם אדני יהוה

²⁴כד ותבני לך גב ותעשי לך רמה בכל רחוב

²⁵כה אל כל ראש דרך בנית רמתך ותתעבי את יפיך ותפשקי את רגליך לכל עובר ותרבי את תזנותך (תזנותיך)

²⁶כו ותזני אל בני מצרים שכניך גדלי בשר ותרבי את תזנתך להכעיסני

²⁷כז והנה נטיתי ידי עליך ואגרע חקך ואתנך בנפש שנאותיך בנות פלשתים--הנכלמות מדרכך זמה

²⁸כח ותזני אל בני אשור מבלתי שבעתך ותזנים וגם לא שבעת

²⁹כט ותרבי את תזנותך אל ארץ כנען כשדימה וגם בזאת לא שבעת

³⁰ל מה אמלה לבתך נאם אדני יהוה--בעשותך את כל אלה מעשה אשה זונה שלטת

³¹לא בבנותיך גבך בראש כל דרך ורמתך עשיתי (עשית) בכל רחוב ולא הייתי (היית) כזונה לקלס אתנן

³²לב האשה המנאפת--תחת אישה תקח את זרים

³³לג לכל זנות יתנו נדה ואת נתת את נדניך לכל מאהביך ותשחדי אותם לבוא אליך מסביב בתזנותיך

³⁴לד ויהי בך הפך מן הנשים בתזנותיך ואחריך לא זונה ובתתך אתנן ואתנן לא נתן לך--ותהי להפך

³⁵לה לכן זונה שמעי דבר יהוה {פ}

³⁶לו כה אמר אדני יהוה יען השפך נחשתך ותגלה ערותך בתזנותיך על מאהביך ועל כל גלולי תועבותיך וכדמי בניך אשר נתת להם

³⁷לז לכן הנני מקבץ את כל מאהביך אשר ערבת עליהם ואת כל אשר אהבת על כל אשר שנאת וקבצתי אתם עליך מסביב וגליתי ערותך אלהם וראו את כל ערותך

³⁸לח ושפטתיך משפטי נאפות ושפכת דם ונתתיך דם חמה וקנאה

³⁹לט ונתתי אתך בידם והרסו גבך ונתצו רמתיך והפשיטו אותך בגדיך ולקחו כלי תפארתך והניחוך עירם ועריה

⁴⁰מ והעלו עליך קהל ורגמו אותך באבן ובתקוך בחרבותם

⁴¹מא ושרפו בתיך באש ועשו בך שפטים לעיני נשים רבות והשבתיך מזונה וגם אתנן לא תתני עוד

⁴²מב והנחתי חמתי בך וסרה קנאתי ממך ושקטתי ולא אכעס עוד

⁴³מג יען אשר לא זכרתי (זכרת) את ימי נעוריך ותרגזי לי בכל אלה וגם אני הא דרכך בראש נתתי נאם אדני יהוה ולא עשיתי (עשית) את הזמה על כל תועבתיך

⁴⁴מד הנה כל המשל עליך ימשל לאמר כאמה בתה

⁴⁵מה בת אמך את געלת אישה ובניה ואחות אחותך את אשר געלו אנשיהן ובניהן--אמכן חתית ואביכן אמרי

⁴⁶מו ואחותך הגדולה שמרון היא ובנותיה היושבת על שמאולך ואחותך הקטנה ממך היושבת מימינך--סדם ובנותיה

⁴⁷מז ולא בדרכיהן הלכת וכתועבותיהן עשיתי (עשית) כמעט קט ותשחתי מהן בכל דרכיך

⁴⁸מח חי אני נאם אדני יהוה אם עשתה סדם אחותך היא ובנותיה--כאשר עשית את ובנותיך

⁴⁹מט הנה זה היה עון סדם אחותך גאון שבעת לחם ושלות השקט היה לה ולבנותיה ויד עני ואביון לא החזיקה

⁵⁰נ ותגבהינה ותעשינה תועבה לפני ואסיר אתהן כאשר ראיתי {ס}

⁵¹נא ושמרון כחצי חטאתיך לא חטאה ותרבי את תועבותיך מהנה ותצדקי את אחותך (אחותיך) בכל תועבתיך אשר עשיתי (עשית)

⁵²נב גם את שאי כלמתך אשר פללת לאחותך בחטאתיך אשר התעבת מהן תצדקנה ממך וגם את בושי ושאי כלמתך בצדקתך אחיותך

⁵³נג ושבתי את שביתהן--את שבית (שבות) סדם ובנותיה ואת שבית (שבות) שמרון ובנותיה ושבית (ושבות) שביתיך בתוכהנה

⁵⁴נד למען תשאי כלמתך ונכלמת מכל אשר עשית--בנחמך אתן

⁵⁵נה ואחותיך סדם ובנותיה תשבן לקדמתן ושמרון ובנותיה תשבן לקדמתן ואת ובנותיך תשבינה לקדמתכן

⁵⁶נו ולוא היתה סדם אחותך לשמועה בפיך ביום גאוניך

⁵⁷נז בטרם תגלה רעתך כמו עת חרפת בנות ארם וכל סביבותיה בנות פלשתים השאטות אותך מסביב

⁵⁸נח את זמתך ואת תועבותיך את נשאתים--נאם יהוה {ס}

⁵⁹נט כי כה אמר אדני יהוה ועשית (ועשיתי) אותך כאשר עשית--אשר בזית אלה להפר ברית

⁶⁰ס וזכרתי אני את בריתי אותך בימי נעוריך והקימותי לך ברית עולם

⁶¹סא וזכרת את דרכיך ונכלמת בקחתך את אחותיך הגדלות ממך אל הקטנות ממך ונתתי אתהן לך לבנות ולא מבריתך

⁶²סב והקימתי אני את בריתי אתך וידעת כי אני יהוה

⁶³סג למען תזכרי ובשת ולא יהיה לך עוד פתחון פה מפני כלמתך--בכפרי לך לכל אשר עשית נאם אדני יהוה {פ}