Read כֶּתֶר אֲרָם צוֹבָא - Tanah Aleppo Codex יחזקאל 22 Bible Online

יחזקאל 22 - כֶּתֶר אֲרָם צוֹבָא - Tanah Aleppo Codex bible

יחזקאל 22

¹א ויהי דבר יהוה אלי לאמר

²ב ואתה בן אדם התשפט התשפט את עיר הדמים והודעתה את כל תועבותיה

³ג ואמרת כה אמר אדני יהוה עיר שפכת דם בתוכה לבוא עתה ועשתה גלולים עליה לטמאה

⁴ד בדמך אשר שפכת אשמת ובגלוליך אשר עשית טמאת ותקריבי ימיך ותבוא עד שנותיך על כן נתתיך חרפה לגוים וקלסה לכל הארצות

⁵ה הקרבות והרחקות ממך יתקלסו בך--טמאת השם רבת המהומה

⁶ו הנה נשיאי ישראל איש לזרעו היו בך למען שפך דם

⁷ז אב ואם הקלו בך לגר עשו בעשק בתוכך יתום ואלמנה הונו בך

⁸ח קדשי בזית ואת שבתתי חללת

⁹ט אנשי רכיל היו בך למען שפך דם ואל ההרים אכלו בך זמה עשו בתוכך

¹⁰י ערות אב גלה בך טמאת הנדה ענו בך

¹¹יא ואיש את אשת רעהו עשה תועבה ואיש את כלתו טמא בזמה ואיש את אחתו בת אביו ענה בך

¹²יב שחד לקחו בך למען שפך דם נשך ותרבית לקחת ותבצעי רעיך בעשק ואתי שכחת נאם אדני יהוה

¹³יג והנה הכיתי כפי אל בצעך אשר עשית ועל דמך אשר היו בתוכך

¹⁴יד היעמד לבך אם תחזקנה ידיך לימים אשר אני עשה אותך אני יהוה דברתי ועשיתי

¹⁵טו והפיצותי אותך בגוים וזריתיך בארצות והתמתי טמאתך ממך

¹⁶טז ונחלת בך לעיני גוים וידעת כי אני יהוה {פ}

¹⁷יז ויהי דבר יהוה אלי לאמר

¹⁸יח בן אדם היו לי בית ישראל לסוג (לסיג) כלם נחשת ובדיל וברזל ועופרת בתוך כור--סגים כסף היו {ס}

¹⁹יט לכן כה אמר אדני יהוה יען היות כלכם לסגים לכן הנני קבץ אתכם אל תוך ירושלם

²⁰כ קבצת כסף ונחשת וברזל ועופרת ובדיל אל תוך כור לפחת עליו אש להנתיך כן אקבץ באפי ובחמתי והנחתי והתכתי אתכם

²¹כא וכנסתי אתכם ונפחתי עליכם באש עברתי ונתכתם בתוכה

²²כב כהתוך כסף בתוך כור כן תתכו בתוכה וידעתם כי אני יהוה שפכתי חמתי עליכם {פ}

²³כג ויהי דבר יהוה אלי לאמר

²⁴כד בן אדם--אמר לה את ארץ לא מטהרה היא לא גשמה ביום זעם

²⁵כה קשר נביאיה בתוכה כארי שואג טרף טרף נפש אכלו חסן ויקר יקחו--אלמנותיה הרבו בתוכה

²⁶כו כהניה חמסו תורתי ויחללו קדשי--בין קדש לחל לא הבדילו ובין הטמא לטהור לא הודיעו ומשבתותי העלימו עיניהם ואחל בתוכם

²⁷כז שריה בקרבה כזאבים טרפי טרף--לשפך דם לאבד נפשות למען בצע בצע

²⁸כח ונביאיה טחו להם תפל--חזים שוא וקסמים להם כזב אמרים כה אמר אדני יהוה ויהוה לא דבר

²⁹כט עם הארץ עשקו עשק וגזלו גזל ועני ואביון הונו ואת הגר עשקו בלא משפט

³⁰ל ואבקש מהם איש גדר גדר ועמד בפרץ לפני בעד הארץ--לבלתי שחתה ולא מצאתי

³¹לא ואשפך עליהם זעמי באש עברתי כליתים דרכם בראשם נתתי נאם אדני יהוה {פ}