Read כֶּתֶר אֲרָם צוֹבָא - Tanah Aleppo Codex יחזקאל 28 Bible Online

יחזקאל 28 - כֶּתֶר אֲרָם צוֹבָא - Tanah Aleppo Codex bible

יחזקאל 28

¹א ויהי דבר יהוה אלי לאמר

²ב בן אדם אמר לנגיד צר כה אמר אדני יהוה יען גבה לבך ותאמר אל אני--מושב אלהים ישבתי בלב ימים ואתה אדם ולא אל ותתן לבך כלב אלהים

³ג הנה חכם אתה מדנאל (מדניאל) כל סתום לא עממוך

⁴ד בחכמתך ובתבונתך עשית לך חיל ותעש זהב וכסף באוצרותיך

⁵ה ברב חכמתך ברכלתך הרבית חילך ויגבה לבבך בחילך {ס}

⁶ו לכן כה אמר אדני יהוה יען תתך את לבבך כלב אלהים

⁷ז לכן הנני מביא עליך זרים--עריצי גוים והריקו חרבותם על יפי חכמתך וחללו יפעתך

⁸ח לשחת יורדוך ומתה ממותי חלל בלב ימים

⁹ט האמר תאמר אלהים אני לפני הרגך ואתה אדם ולא אל ביד מחלליך

¹⁰י מותי ערלים תמות ביד זרים כי אני דברתי נאם אדני יהוה {פ}

¹¹יא ויהי דבר יהוה אלי לאמר

¹²יב בן אדם שא קינה על מלך צור ואמרת לו כה אמר אדני יהוה אתה חותם תכנית מלא חכמה וכליל יפי

¹³יג בעדן גן אלהים היית כל אבן יקרה מסכתך אדם פטדה ויהלם תרשיש שהם וישפה ספיר נפך וברקת וזהב מלאכת תפיך ונקביך בך ביום הבראך כוננו

¹⁴יד את כרוב--ממשח הסוכך ונתתיך בהר קדש אלהים היית--בתוך אבני אש התהלכת

¹⁵טו תמים אתה בדרכיך מיום הבראך עד נמצא עולתה בך

¹⁶טז ברב רכלתך מלו תוכך חמס--ותחטא ואחללך מהר אלהים ואבדך כרוב הסכך מתוך אבני אש

¹⁷יז גבה לבך ביפיך שחת חכמתך על יפעתך על ארץ השלכתיך לפני מלכים נתתיך--לראוה בך

¹⁸יח מרב עוניך בעול רכלתך חללת מקדשיך ואוצא אש מתוכך היא אכלתך ואתנך לאפר על הארץ לעיני כל ראיך

¹⁹יט כל יודעיך בעמים שממו עליך בלהות היית ואינך עד עולם {פ}

²⁰כ ויהי דבר יהוה אלי לאמר

²¹כא בן אדם שים פניך אל צידון והנבא עליה

²²כב ואמרת כה אמר אדני יהוה הנני עליך צידון ונכבדתי בתוכך וידעו כי אני יהוה בעשותי בה שפטים--ונקדשתי בה

²³כג ושלחתי בה דבר ודם בחוצותיה ונפלל חלל בתוכה בחרב עליה מסביב וידעו כי אני יהוה

²⁴כד ולא יהיה עוד לבית ישראל סלון ממאיר וקוץ מכאב מכל סביבתם השאטים אותם וידעו כי אני אדני יהוה {פ}

²⁵כה כה אמר אדני יהוה בקבצי את בית ישראל מן העמים אשר נפצו בם ונקדשתי בם לעיני הגוים וישבו על אדמתם אשר נתתי לעבדי ליעקב

²⁶כו וישבו עליה לבטח ובנו בתים ונטעו כרמים וישבו לבטח בעשותי שפטים בכל השאטים אתם מסביבותם--וידעו כי אני יהוה אלהיהם {פ}