Read כֶּתֶר אֲרָם צוֹבָא - Tanah Aleppo Codex יחזקאל 30 Bible Online

יחזקאל 30 - כֶּתֶר אֲרָם צוֹבָא - Tanah Aleppo Codex bible

יחזקאל 30

¹א ויהי דבר יהוה אלי לאמר

²ב בן אדם--הנבא ואמרת כה אמר אדני יהוה הילילו הה ליום

³ג כי קרוב יום וקרוב יום ליהוה יום ענן עת גוים יהיה

⁴ד ובאה חרב במצרים והיתה חלחלה בכוש בנפל חלל במצרים ולקחו המונה ונהרסו יסדותיה

⁵ה כוש ופוט ולוד וכל הערב וכוב ובני ארץ הברית--אתם בחרב יפלו {פ}

⁶ו כה אמר יהוה ונפלו סמכי מצרים וירד גאון עזה ממגדל סונה בחרב יפלו בה--נאם אדני יהוה

⁷ז ונשמו בתוך ארצות נשמות ועריו בתוך ערים נחרבות תהיינה

⁸ח וידעו כי אני יהוה בתתי אש במצרים ונשברו כל עזריה

⁹ט ביום ההוא יצאו מלאכים מלפני בצים להחריד את כוש בטח והיתה חלחלה בהם ביום מצרים כי הנה באה {ס}

¹⁰י כה אמר אדני יהוה והשבתי את המון מצרים ביד נבוכדראצר מלך בבל

¹¹יא הוא ועמו אתו עריצי גוים--מובאים לשחת הארץ והריקו חרבותם על מצרים ומלאו את הארץ חלל

¹²יב ונתתי יארים חרבה ומכרתי את הארץ ביד רעים והשמתי ארץ ומלאה ביד זרים--אני יהוה דברתי {ס}

¹³יג כה אמר אדני יהוה והאבדתי גלולים והשבתי אלילים מנף ונשיא מארץ מצרים לא יהיה עוד ונתתי יראה בארץ מצרים

¹⁴יד והשמתי את פתרוס ונתתי אש בצען ועשיתי שפטים בנא

¹⁵טו ושפכתי חמתי על סין מעוז מצרים והכרתי את המון נא

¹⁶טז ונתתי אש במצרים--חול תחיל (תחול) סין ונא תהיה להבקע ונף צרי יומם

¹⁷יז בחורי און ופי בסת בחרב יפלו והנה בשבי תלכנה

¹⁸יח ובתחפנחס חשך היום בשברי שם את מטות מצרים ונשבת בה גאון עזה היא ענן יכסנה ובנותיה בשבי תלכנה

¹⁹יט ועשיתי שפטים במצרים וידעו כי אני יהוה {פ}

²⁰כ ויהי באחת עשרה שנה בראשון בשבעה לחדש היה דבר יהוה אלי לאמר

²¹כא בן אדם את זרוע פרעה מלך מצרים שברתי והנה לא חבשה לתת רפאות לשום חתול לחבשה לחזקה--לתפש בחרב {ס}

²²כב לכן כה אמר אדני יהוה הנני אל פרעה מלך מצרים ושברתי את זרעתיו את החזקה ואת הנשברת והפלתי את החרב מידו

²³כג והפצותי את מצרים בגוים וזריתם בארצות

²⁴כד וחזקתי את זרעות מלך בבל ונתתי את חרבי בידו ושברתי את זרעות פרעה ונאק נאקות חלל לפניו

²⁵כה והחזקתי את זרעות מלך בבל וזרעות פרעה תפלנה וידעו כי אני יהוה בתתי חרבי ביד מלך בבל ונטה אותה אל ארץ מצרים

²⁶כו והפצותי את מצרים בגוים וזריתי אותם בארצות וידעו כי אני יהוה {פ}