Read כֶּתֶר אֲרָם צוֹבָא - Tanah Aleppo Codex יחזקאל 46 Bible Online

יחזקאל 46 - כֶּתֶר אֲרָם צוֹבָא - Tanah Aleppo Codex bible

יחזקאל 46

¹א כה אמר אדני יהוה שער החצר הפנימית הפנה קדים יהיה סגור ששת ימי המעשה וביום השבת יפתח וביום החדש יפתח

²ב ובא הנשיא דרך אולם השער מחוץ ועמד על מזוזת השער ועשו הכהנים את עולתו ואת שלמיו והשתחוה על מפתן השער ויצא והשער לא יסגר עד הערב

³ג והשתחוו עם הארץ פתח השער ההוא בשבתות ובחדשים--לפני יהוה

⁴ד והעלה אשר יקרב הנשיא ליהוה ביום השבת ששה כבשים תמימם--ואיל תמים

⁵ה ומנחה איפה לאיל ולכבשים מנחה מתת ידו ושמן הין לאיפה {ס}

⁶ו וביום החדש פר בן בקר תמימם וששת כבשים ואיל תמימם יהיו

⁷ז ואיפה לפר ואיפה לאיל יעשה מנחה ולכבשים כאשר תשיג ידו ושמן הין לאיפה

⁸ח ובבוא הנשיא--דרך אולם השער יבוא ובדרכו יצא

⁹ט ובבוא עם הארץ לפני יהוה במועדים הבא דרך שער צפון להשתחות יצא דרך שער נגב והבא דרך שער נגב יצא דרך שער צפונה לא ישוב דרך השער אשר בא בו--כי נכחו יצאו (יצא)

¹⁰י והנשיא--בתוכם בבואם יבוא ובצאתם יצאו

¹¹יא ובחגים ובמועדים תהיה המנחה איפה לפר ואיפה לאיל ולכבשים מתת ידו ושמן הין לאיפה {פ}

¹²יב וכי יעשה הנשיא נדבה עולה או שלמים נדבה ליהוה ופתח לו את השער הפנה קדים ועשה את עלתו ואת שלמיו כאשר יעשה ביום השבת ויצא וסגר את השער אחרי צאתו

¹³יג וכבש בן שנתו תמים תעשה עולה ליום--ליהוה בבקר בבקר תעשה אתו

¹⁴יד ומנחה תעשה עליו בבקר בבקר ששית האיפה ושמן שלישית ההין לרס את הסלת מנחה ליהוה--חקות עולם תמיד

¹⁵טו ועשו (יעשו) את הכבש ואת המנחה ואת השמן בבקר בבקר עולת תמיד {ס}

¹⁶טז כה אמר אדני יהוה כי יתן הנשיא מתנה לאיש מבניו--נחלתו היא לבניו תהיה אחזתם היא בנחלה {ס}

¹⁷יז וכי יתן מתנה מנחלתו לאחד מעבדיו--והיתה לו עד שנת הדרור ושבת לנשיא אך נחלתו--בניו להם תהיה

¹⁸יח ולא יקח הנשיא מנחלת העם להונתם מאחזתם--מאחזתו ינחל את בניו למען אשר לא יפצו עמי איש מאחזתו

¹⁹יט ויביאני במבוא אשר על כתף השער אל הלשכות הקדש אל הכהנים הפנות צפונה והנה שם מקום בירכתם (בירכתים) ימה

²⁰כ ויאמר אלי--זה המקום אשר יבשלו שם הכהנים את האשם ואת החטאת אשר יאפו את המנחה לבלתי הוציא אל החצר החיצונה לקדש את העם

²¹כא ויוציאני אל החצר החיצונה ויעברני אל ארבעת מקצועי החצר והנה חצר במקצע החצר חצר במקצע החצר

²²כב בארבעת מקצעות החצר חצרות קטרות--ארבעים ארך ושלשים רחב מדה אחת לארבעתם מהקצעות

²³כג וטור סביב בהם סביב לארבעתם ומבשלות עשוי מתחת הטירות סביב

²⁴כד ויאמר אלי אלה בית המבשלים אשר יבשלו שם משרתי הבית את זבח העם