Read כֶּתֶר אֲרָם צוֹבָא - Tanah Aleppo Codex יחזקאל 47 Bible Online

יחזקאל 47 - כֶּתֶר אֲרָם צוֹבָא - Tanah Aleppo Codex bible

יחזקאל 47

¹א וישבני אל פתח הבית והנה מים יצאים מתחת מפתן הבית קדימה כי פני הבית קדים והמים ירדים מתחת מכתף הבית הימנית מנגב למזבח

²ב ויוצאני דרך שער צפונה ויסבני דרך חוץ אל שער החוץ דרך הפונה קדים והנה מים מפכים מן הכתף הימנית

³ג בצאת האיש קדים וקו בידו וימד אלף באמה ויעברני במים מי אפסים

⁴ד וימד אלף ויעברני במים מים ברכים וימד אלף ויעברני מי מתנים

⁵ה וימד אלף--נחל אשר לא אוכל לעבר כי גאו המים מי שחו נחל אשר לא יעבר

⁶ו ויאמר אלי הראית בן אדם ויולכני וישבני שפת הנחל

⁷ז בשובני--והנה אל שפת הנחל עץ רב מאד מזה ומזה

⁸ח ויאמר אלי המים האלה יוצאים אל הגלילה הקדמונה וירדו על הערבה ובאו הימה אל הימה המוצאים ונרפאו המים

⁹ט והיה כל נפש חיה אשר ישרץ אל כל אשר יבוא שם נחלים יחיה והיה הדגה רבה מאד כי באו שמה המים האלה וירפאו וחי--כל אשר יבוא שמה הנחל

¹⁰י והיה יעמדו (עמדו) עליו דוגים מעין גדי ועד עין עגלים--משטוח לחרמים יהיו למינה תהיה דגתם כדגת הים הגדול רבה מאד

¹¹יא בצאתו וגבאיו ולא ירפאו למלח נתנו

¹²יב ועל הנחל יעלה על שפתו מזה ומזה כל עץ מאכל לא יבול עלהו ולא יתם פריו לחדשיו יבכר--כי מימיו מן המקדש המה יוצאים והיו (והיה) פריו למאכל ועלהו לתרופה {פ}

¹³יג כה אמר אדני יהוה גה גבול אשר תתנחלו את הארץ לשני עשר שבטי ישראל--יוסף חבלים

¹⁴יד ונחלתם אותה איש כאחיו אשר נשאתי את ידי לתתה לאבתיכם ונפלה הארץ הזאת לכם--בנחלה

¹⁵טו וזה גבול הארץ לפאת צפונה מן הים הגדול הדרך חתלן--לבוא צדדה

¹⁶טז חמת ברותה סברים אשר בין גבול דמשק ובין גבול חמת חצר התיכון אשר אל גבול חורן

¹⁷יז והיה גבול מן הים חצר עינון גבול דמשק וצפון צפונה וגבול חמת ואת פאת צפון

¹⁸יח ופאת קדים מבין חורן ומבין דמשק ומבין הגלעד ומבין ארץ ישראל הירדן--מגבול על הים הקדמוני תמדו ואת פאת קדימה

¹⁹יט ופאת נגב תימנה מתמר עד מי מריבות קדש נחלה אל הים הגדול ואת פאת תימנה נגבה

²⁰כ ופאת ים הים הגדול מגבול עד נכח לבוא חמת זאת פאת ים

²¹כא וחלקתם את הארץ הזאת לכם--לשבטי ישראל

²²כב והיה תפלו אותה בנחלה לכם ולהגרים הגרים בתוככם אשר הולדו בנים בתוככם והיו לכם כאזרח בבני ישראל--אתכם יפלו בנחלה בתוך שבטי ישראל

²³כג והיה בשבט אשר גר הגר אתו--שם תתנו נחלתו נאם אדני יהוה {פ}