Read כֶּתֶר אֲרָם צוֹבָא - Tanah Aleppo Codex יחזקאל 7 Bible Online

יחזקאל 7 - כֶּתֶר אֲרָם צוֹבָא - Tanah Aleppo Codex bible

יחזקאל 7

¹א ויהי דבר יהוה אלי לאמר

²ב ואתה בן אדם כה אמר אדני יהוה לאדמת ישראל--קץ בא הקץ על ארבעת (ארבע) כנפות הארץ

³ג עתה הקץ עליך ושלחתי אפי בך ושפטתיך כדרכיך ונתתי עליך את כל תועבותיך

⁴ד ולא תחוס עיני עליך ולא אחמול כי דרכיך עליך אתן ותועבותיך בתוכך תהיין וידעתם כי אני יהוה {פ}

⁵ה כה אמר אדני יהוה רעה אחת רעה הנה באה

⁶ו קץ בא בא הקץ הקיץ אליך הנה באה

⁷ז באה הצפירה אליך יושב הארץ בא העת קרוב היום מהומה--ולא הד הרים

⁸ח עתה מקרוב אשפוך חמתי עליך וכליתי אפי בך ושפטתיך כדרכיך ונתתי עליך את כל תועבותיך

⁹ט ולא תחוס עיני ולא אחמול כדרכיך עליך אתן ותועבותיך בתוכך תהיין וידעתם כי אני יהוה מכה

¹⁰י הנה היום הנה באה יצאה הצפרה--צץ המטה פרח הזדון

¹¹יא החמס קם למטה רשע לא מהם ולא מהמונם ולא מהמהם--ולא נה בהם

¹²יב בא העת הגיע היום--הקונה אל ישמח והמכר אל יתאבל כי חרון אל כל המונה

¹³יג כי המכר אל הממכר לא ישוב ועוד בחיים חיתם כי חזון אל כל המונה לא ישוב ואיש בעונו חיתו לא יתחזקו

¹⁴יד תקעו בתקוע והכין הכל ואין הלך למלחמה כי חרוני אל כל המונה

¹⁵טו החרב בחוץ והדבר והרעב מבית אשר בשדה בחרב ימות ואשר בעיר רעב ודבר יאכלנו

¹⁶טז ופלטו פליטיהם והיו אל ההרים כיוני הגאיות כלם המות--איש בעונו

¹⁷יז כל הידים תרפינה וכל ברכים תלכנה מים

¹⁸יח וחגרו שקים וכסתה אותם פלצות ואל כל פנים בושה ובכל ראשיהם קרחה

¹⁹יט כספם בחוצות ישליכו וזהבם לנדה יהיה--כספם וזהבם לא יוכל להצילם ביום עברת יהוה נפשם לא ישבעו ומעיהם לא ימלאו כי מכשול עונם היה

²⁰כ וצבי עדיו לגאון שמהו וצלמי תועבתם שקוציהם עשו בו על כן נתתיו להם לנדה

²¹כא ונתתיו ביד הזרים לבז ולרשעי הארץ לשלל וחללוה (וחללוהו)

²²כב והסבותי פני מהם וחללו את צפוני ובאו בה פריצים וחללוה {פ}

²³כג עשה הרתוק כי הארץ מלאה משפט דמים והעיר מלאה חמס

²⁴כד והבאתי רעי גוים וירשו את בתיהם והשבתי גאון עזים ונחלו מקדשיהם

²⁵כה קפדה בא ובקשו שלום ואין

²⁶כו הוה על הוה תבוא ושמעה אל שמועה תהיה ובקשו חזון מנביא--ותורה תאבד מכהן ועצה מזקנים

²⁷כז המלך יתאבל ונשיא ילבש שממה וידי עם הארץ תבהלנה מדרכם אעשה אתם ובמשפטיהם אשפטם וידעו כי אני יהוה {פ}