Read כֶּתֶר אֲרָם צוֹבָא - Tanah Aleppo Codex דניאל 8 Bible Online

דניאל 8 - כֶּתֶר אֲרָם צוֹבָא - Tanah Aleppo Codex bible

דניאל 8

¹א בשנת שלוש למלכות בלאשצר המלך--חזון נראה אלי אני דניאל אחרי הנראה אלי בתחלה

²ב ואראה בחזון ויהי בראתי ואני בשושן הבירה אשר בעילם המדינה ואראה בחזון ואני הייתי על אובל אולי

³ג ואשא עיני ואראה והנה איל אחד עמד לפני האבל ולו קרנים והקרנים גבהות והאחת גבהה מן השנית והגבהה עלה באחרנה

⁴ד ראיתי את האיל מנגח ימה וצפונה ונגבה וכל חיות לא יעמדו לפניו ואין מציל מידו ועשה כרצנו והגדיל

⁵ה ואני הייתי מבין והנה צפיר העזים בא מן המערב על פני כל הארץ ואין נוגע בארץ והצפיר--קרן חזות בין עיניו

⁶ו ויבא עד האיל בעל הקרנים אשר ראיתי עמד לפני האבל וירץ אליו בחמת כחו

⁷ז וראיתיו מגיע אצל האיל ויתמרמר אליו ויך את האיל וישבר את שתי קרניו ולא היה כח באיל לעמד לפניו וישליכהו ארצה וירמסהו ולא היה מציל לאיל מידו

⁸ח וצפיר העזים הגדיל עד מאד וכעצמו נשברה הקרן הגדלה ותעלנה חזות ארבע תחתיה לארבע רוחות השמים

⁹ט ומן האחת מהם יצא קרן אחת מצעירה ותגדל יתר אל הנגב ואל המזרח ואל הצבי

¹⁰י ותגדל עד צבא השמים ותפל ארצה מן הצבא ומן הכוכבים ותרמסם

¹¹יא ועד שר הצבא הגדיל וממנו הרים (הורם) התמיד והשלך מכון מקדשו

¹²יב וצבא תנתן על התמיד בפשע ותשלך אמת ארצה ועשתה והצליחה

¹³יג ואשמעה אחד קדוש מדבר ויאמר אחד קדוש לפלמוני המדבר עד מתי החזון התמיד והפשע שמם--תת וקדש וצבא מרמס

¹⁴יד ויאמר אלי--עד ערב בקר אלפים ושלש מאות ונצדק קדש

¹⁵טו ויהי בראתי אני דניאל--את החזון ואבקשה בינה והנה עמד לנגדי כמראה גבר

¹⁶טז ואשמע קול אדם בין אולי ויקרא ויאמר גבריאל הבן להלז את המראה

¹⁷יז ויבא אצל עמדי ובבאו נבעתי ואפלה על פני ויאמר אלי הבן בן אדם כי לעת קץ החזון

¹⁸יח ובדברו עמי נרדמתי על פני ארצה ויגע בי--ויעמידני על עמדי

¹⁹יט ויאמר הנני מודיעך את אשר יהיה באחרית הזעם כי למועד קץ

²⁰כ האיל אשר ראית בעל הקרנים--מלכי מדי ופרס

²¹כא והצפיר השעיר מלך יון והקרן הגדולה אשר בין עיניו הוא המלך הראשון

²²כב והנשברת--ותעמדנה ארבע תחתיה ארבע מלכיות מגוי יעמדנה ולא בכחו

²³כג ובאחרית מלכותם כהתם הפשעים--יעמד מלך עז פנים ומבין חידות

²⁴כד ועצם כחו ולא בכחו ונפלאות ישחית והצליח ועשה והשחית עצומים ועם קדשים

²⁵כה ועל שכלו והצליח מרמה בידו ובלבבו יגדיל ובשלוה ישחית רבים ועל שר שרים יעמד ובאפס יד ישבר

²⁶כו ומראה הערב והבקר אשר נאמר אמת הוא ואתה סתם החזון כי לימים רבים

²⁷כז ואני דניאל נהייתי ונחליתי ימים ואקום ואעשה את מלאכת המלך ואשתומם על המראה ואין מבין {פ}