Read כֶּתֶר אֲרָם צוֹבָא - Tanah Aleppo Codex הושע 1 Bible Online

הושע 1 - כֶּתֶר אֲרָם צוֹבָא - Tanah Aleppo Codex bible

הושע 1

¹א דבר יהוה אשר היה אל הושע בן בארי בימי עזיה יותם אחז יחזקיה מלכי יהודה--ובימי ירבעם בן יואש מלך ישראל

²ב תחלת דבר יהוה בהושע {פ} ויאמר יהוה אל הושע לך קח לך אשת זנונים וילדי זנונים--כי זנה תזנה הארץ מאחרי יהוה

³ג וילך ויקח את גמר בת דבלים ותהר ותלד לו בן

⁴ד ויאמר יהוה אליו קרא שמו יזרעאל כי עוד מעט ופקדתי את דמי יזרעאל על בית יהוא והשבתי ממלכות בית ישראל

⁵ה והיה ביום ההוא ושברתי את קשת ישראל בעמק יזרעאל

⁶ו ותהר עוד ותלד בת ויאמר לו קרא שמה לא רחמה כי לא אוסיף עוד ארחם את בית ישראל--כי נשא אשא להם

⁷ז ואת בית יהודה ארחם והושעתים ביהוה אלהיהם ולא אושיעם בקשת ובחרב ובמלחמה בסוסים ובפרשים

⁸ח ותגמל את לא רחמה ותהר ותלד בן

⁹ט ויאמר קרא שמו לא עמי כי אתם לא עמי ואנכי לא אהיה לכם {פ}