Read כֶּתֶר אֲרָם צוֹבָא - Tanah Aleppo Codex הושע 13 Bible Online

הושע 13 - כֶּתֶר אֲרָם צוֹבָא - Tanah Aleppo Codex bible

הושע 13

¹א כדבר אפרים רתת נשא הוא בישראל ויאשם בבעל וימת

²ב ועתה יוספו לחטא ויעשו להם מסכה מכספם כתבונם עצבים מעשה חרשים כלה להם הם אמרים זבחי אדם עגלים ישקון

³ג לכן יהיו כענן בקר וכטל משכים הלך כמץ יסער מגרן וכעשן מארבה

⁴ד ואנכי יהוה אלהיך מארץ מצרים ואלהים זולתי לא תדע ומושיע אין בלתי

⁵ה אני ידעתיך במדבר--בארץ תלאבות

⁶ו כמרעיתם וישבעו--שבעו וירם לבם על כן שכחוני

⁷ז ואהי להם כמו שחל--כנמר על דרך אשור

⁸ח אפגשם כדב שכול ואקרע סגור לבם ואכלם שם כלביא חית השדה תבקעם

⁹ט שחתך ישראל כי בי בעזרך

¹⁰י אהי מלכך אפוא ויושיעך בכל עריך ושפטיך--אשר אמרת תנה לי מלך ושרים

¹¹יא אתן לך מלך באפי ואקח בעברתי {פ}

¹²יב צרור עון אפרים צפונה חטאתו

¹³יג חבלי יולדה יבאו לו הוא בן לא חכם כי עת לא יעמד במשבר בנים

¹⁴יד מיד שאול אפדם ממות אגאלם אהי דבריך מות אהי קטבך שאול--נחם יסתר מעיני

¹⁵טו כי הוא בין אחים יפריא יבוא קדים רוח יהוה ממדבר עלה ויבוש מקורו ויחרב מעינו--הוא ישסה אוצר כל כלי חמדה