Read כֶּתֶר אֲרָם צוֹבָא - Tanah Aleppo Codex הושע 2 Bible Online

הושע 2 - כֶּתֶר אֲרָם צוֹבָא - Tanah Aleppo Codex bible

הושע 2

¹א והיה מספר בני ישראל כחול הים אשר לא ימד ולא יספר והיה במקום אשר יאמר להם לא עמי אתם יאמר להם בני אל חי

²ב ונקבצו בני יהודה ובני ישראל יחדו ושמו להם ראש אחד ועלו מן הארץ כי גדול יום יזרעאל

³ג אמרו לאחיכם עמי ולאחותיכם רחמה

⁴ד ריבו באמכם ריבו--כי היא לא אשתי ואנכי לא אישה ותסר זנוניה מפניה ונאפופיה מבין שדיה

⁵ה פן אפשיטנה ערמה--והצגתיה כיום הולדה ושמתיה כמדבר ושתה כארץ ציה והמתיה בצמא

⁶ו ואת בניה לא ארחם כי בני זנונים המה

⁷ז כי זנתה אמם הבישה הורתם כי אמרה אלכה אחרי מאהבי נתני לחמי ומימי צמרי ופשתי שמני ושקויי

⁸ח לכן הנני שך את דרכך בסירים וגדרתי את גדרה ונתיבותיה לא תמצא

⁹ט ורדפה את מאהביה ולא תשיג אתם ובקשתם ולא תמצא ואמרה אלכה ואשובה אל אישי הראשון--כי טוב לי אז מעתה

¹⁰י והיא לא ידעה כי אנכי נתתי לה הדגן והתירוש והיצהר וכסף הרביתי לה וזהב עשו לבעל

¹¹יא לכן אשוב--ולקחתי דגני בעתו ותירושי במועדו והצלתי צמרי ופשתי לכסות את ערותה

¹²יב ועתה אגלה את נבלתה לעיני מאהביה ואיש לא יצילנה מידי

¹³יג והשבתי כל משושה חגה חדשה ושבתה--וכל מועדה

¹⁴יד והשמתי גפנה ותאנתה אשר אמרה אתנה המה לי אשר נתנו לי מאהבי ושמתים ליער ואכלתם חית השדה

¹⁵טו ופקדתי עליה את ימי הבעלים אשר תקטיר להם ותעד נזמה וחליתה ותלך אחרי מאהביה ואתי שכחה נאם יהוה {ס}

¹⁶טז לכן הנה אנכי מפתיה והלכתיה המדבר ודברתי על לבה

¹⁷יז ונתתי לה את כרמיה משם ואת עמק עכור לפתח תקוה וענתה שמה כימי נעוריה וכיום עלותה מארץ מצרים

¹⁸יח והיה ביום ההוא נאם יהוה תקראי אישי ולא תקראי לי עוד בעלי

¹⁹יט והסרתי את שמות הבעלים מפיה ולא יזכרו עוד בשמם

²⁰כ וכרתי להם ברית ביום ההוא עם חית השדה ועם עוף השמים ורמש האדמה וקשת וחרב ומלחמה אשבור מן הארץ והשכבתים לבטח

²¹כא וארשתיך לי לעולם וארשתיך לי בצדק ובמשפט ובחסד וברחמים

²²כב וארשתיך לי באמונה וידעת את יהוה {פ}

²³כג והיה ביום ההוא אענה נאם יהוה--אענה את השמים והם יענו את הארץ [ (Hosea 2:24) כד והארץ תענה את הדגן ואת התירוש ואת היצהר והם יענו את יזרעאל ] [ (Hosea 2:25) כה וזרעתיה לי בארץ ורחמתי את לא רחמה ואמרתי ללא עמי עמי אתה והוא יאמר אלהי {פ} ]