Read כֶּתֶר אֲרָם צוֹבָא - Tanah Aleppo Codex הושע 4 Bible Online

הושע 4 - כֶּתֶר אֲרָם צוֹבָא - Tanah Aleppo Codex bible

הושע 4

¹א שמעו דבר יהוה בני ישראל כי ריב ליהוה עם יושבי הארץ--כי אין אמת ואין חסד ואין דעת אלהים בארץ

²ב אלה וכחש ורצח וגנב ונאף פרצו ודמים בדמים נגעו

³ג על כן תאבל הארץ ואמלל כל יושב בה בחית השדה ובעוף השמים וגם דגי הים יאספו

⁴ד אך איש אל ירב ואל יוכח איש ועמך כמריבי כהן

⁵ה וכשלת היום וכשל גם נביא עמך לילה ודמיתי אמך

⁶ו נדמו עמי מבלי הדעת כי אתה הדעת מאסת ואמאסאך (ואמאסך) מכהן לי ותשכח תורת אלהיך אשכח בניך גם אני

⁷ז כרבם כן חטאו לי כבודם בקלון אמיר

⁸ח חטאת עמי יאכלו ואל עונם ישאו נפשו

⁹ט והיה כעם ככהן ופקדתי עליו דרכיו ומעלליו אשיב לו

¹⁰י ואכלו ולא ישבעו הזנו ולא יפרצו כי את יהוה עזבו לשמר

¹¹יא זנות ויין ותירוש יקח לב

¹²יב עמי בעצו ישאל ומקלו יגיד לו כי רוח זנונים התעה ויזנו מתחת אלהיהם

¹³יג על ראשי ההרים יזבחו ועל הגבעות יקטרו תחת אלון ולבנה ואלה כי טוב צלה על כן תזנינה בנותיכם וכלותיכם תנאפנה

¹⁴יד לא אפקוד על בנותיכם כי תזנינה ועל כלותיכם כי תנאפנה--כי הם עם הזנות יפרדו ועם הקדשות יזבחו ועם לא יבין ילבט

¹⁵טו אם זנה אתה ישראל אל יאשם יהודה ואל תבאו הגלגל ואל תעלו בית און ואל תשבעו חי יהוה

¹⁶טז כי כפרה סררה סרר ישראל עתה ירעם יהוה ככבש במרחב

¹⁷יז חבור עצבים אפרים הנח לו

¹⁸יח סר סבאם הזנה הזנו אהבו הבו קלון מגניה

¹⁹יט צרר רוח אותה בכנפיה ויבשו מזבחותם {פ}