Read כֶּתֶר אֲרָם צוֹבָא - Tanah Aleppo Codex הושע 5 Bible Online

הושע 5 - כֶּתֶר אֲרָם צוֹבָא - Tanah Aleppo Codex bible

הושע 5

¹א שמעו זאת הכהנים והקשיבו בית ישראל ובית המלך האזינו--כי לכם המשפט כי פח הייתם למצפה ורשת פרושה על תבור

²ב ושחטה שטים העמיקו ואני מוסר לכלם

³ג אני ידעתי אפרים וישראל לא נכחד ממני כי עתה הזנית אפרים נטמא ישראל

⁴ד לא יתנו מעלליהם לשוב אל אלהיהם כי רוח זנונים בקרבם ואת יהוה לא ידעו

⁵ה וענה גאון ישראל בפניו וישראל ואפרים יכשלו בעונם--כשל גם יהודה עמם

⁶ו בצאנם ובבקרם ילכו לבקש את יהוה--ולא ימצאו חלץ מהם

⁷ז ביהוה בגדו כי בנים זרים ילדו עתה יאכלם חדש את חלקיהם {ס}

⁸ח תקעו שופר בגבעה חצצרה ברמה הריעו בית און אחריך בנימין

⁹ט אפרים לשמה תהיה ביום תוכחה בשבטי ישראל הודעתי נאמנה

¹⁰י היו שרי יהודה כמסיגי גבול עליהם אשפוך כמים עברתי

¹¹יא עשוק אפרים רצוץ משפט כי הואיל הלך אחרי צו

¹²יב ואני כעש לאפרים וכרקב לבית יהודה

¹³יג וירא אפרים את חליו ויהודה את מזרו וילך אפרים אל אשור וישלח אל מלך ירב והוא לא יוכל לרפא לכם ולא יגהה מכם מזור

¹⁴יד כי אנכי כשחל לאפרים וככפיר לבית יהודה אני אני אטרף ואלך אשא ואין מציל

¹⁵טו אלך אשובה אל מקומי עד אשר יאשמו ובקשו פני בצר להם ישחרנני