Read כֶּתֶר אֲרָם צוֹבָא - Tanah Aleppo Codex הושע 7 Bible Online

הושע 7 - כֶּתֶר אֲרָם צוֹבָא - Tanah Aleppo Codex bible

הושע 7

¹א כרפאי לישראל ונגלה עון אפרים ורעות שמרון--כי פעלו שקר וגנב יבוא פשט גדוד בחוץ

²ב ובל יאמרו ללבבם כל רעתם זכרתי עתה סבבום מעלליהם נגד פני היו

³ג ברעתם ישמחו מלך ובכחשיהם שרים

⁴ד כלם מנאפים--כמו תנור בערה מאפה ישבות מעיר מלוש בצק עד חמצתו

⁵ה יום מלכנו החלו שרים חמת מיין משך ידו את לצצים

⁶ו כי קרבו כתנור לבם בארבם כל הלילה ישן אפהם--בקר הוא בער כאש להבה

⁷ז כלם יחמו כתנור ואכלו את שפטיהם כל מלכיהם נפלו אין קרא בהם אלי

⁸ח אפרים בעמים הוא יתבולל אפרים היה עגה בלי הפוכה

⁹ט אכלו זרים כחו והוא לא ידע גם שיבה זרקה בו והוא לא ידע

¹⁰י וענה גאון ישראל בפניו ולא שבו אל יהוה אלהיהם ולא בקשהו בכל זאת

¹¹יא ויהי אפרים כיונה פותה אין לב מצרים קראו אשור הלכו

¹²יב כאשר ילכו אפרוש עליהם רשתי--כעוף השמים אורידם איסירם כשמע לעדתם {ס}

¹³יג אוי להם כי נדדו ממני שד להם כי פשעו בי ואנכי אפדם--והמה דברו עלי כזבים

¹⁴יד ולא זעקו אלי בלבם כי יילילו על משכבותם על דגן ותירוש יתגוררו יסורו בי

¹⁵טו ואני יסרתי חזקתי זרועתם ואלי יחשבו רע

¹⁶טז ישובו לא על היו כקשת רמיה--יפלו בחרב שריהם מזעם לשונם זו לעגם בארץ מצרים