Read כֶּתֶר אֲרָם צוֹבָא - Tanah Aleppo Codex הושע 8 Bible Online

הושע 8 - כֶּתֶר אֲרָם צוֹבָא - Tanah Aleppo Codex bible

הושע 8

¹א אל חכך שפר כנשר על בית יהוה--יען עברו בריתי ועל תורתי פשעו

²ב לי יזעקו אלהי ידענוך ישראל

³ג זנח ישראל טוב אויב ירדפו

⁴ד הם המליכו ולא ממני השירו ולא ידעתי כספם וזהבם עשו להם עצבים למען יכרת

⁵ה זנח עגלך שמרון חרה אפי בם עד מתי לא יוכלו נקין

⁶ו כי מישראל והוא--חרש עשהו ולא אלהים הוא כי שבבים יהיה עגל שמרון

⁷ז כי רוח יזרעו וסופתה יקצרו קמה אין לו צמח בלי יעשה קמח--אולי יעשה זרים יבלעהו

⁸ח נבלע ישראל עתה היו בגוים ככלי אין חפץ בו

⁹ט כי המה עלו אשור פרא בודד לו אפרים התנו אהבים

¹⁰י גם כי יתנו בגוים עתה אקבצם ויחלו מעט ממשא מלך שרים

¹¹יא כי הרבה אפרים מזבחות לחטא היו לו מזבחות לחטא

¹²יב אכתוב (אכתב) לו--רבו (רבי) תורתי כמו זר נחשבו

¹³יג זבחי הבהבי יזבחו בשר ויאכלו--יהוה לא רצם עתה יזכר עונם ויפקד חטאותם--המה מצרים ישובו

¹⁴יד וישכח ישראל את עשהו ויבן היכלות ויהודה הרבה ערים בצרות ושלחתי אש בעריו ואכלה ארמנתיה {פ}