Read כֶּתֶר אֲרָם צוֹבָא - Tanah Aleppo Codex הושע 9 Bible Online

הושע 9 - כֶּתֶר אֲרָם צוֹבָא - Tanah Aleppo Codex bible

הושע 9

¹א אל תשמח ישראל אל גיל כעמים כי זנית מעל אלהיך אהבת אתנן על כל גרנות דגן

²ב גרן ויקב לא ירעם ותירוש יכחש בה

³ג לא ישבו בארץ יהוה ושב אפרים מצרים ובאשור טמא יאכלו

⁴ד לא יסכו ליהוה יין ולא יערבו לו--זבחיהם כלחם אונים להם כל אכליו יטמאו כי לחמם לנפשם לא יבוא בית יהוה

⁵ה מה תעשו ליום מועד וליום חג יהוה

⁶ו כי הנה הלכו משד מצרים תקבצם מף תקברם מחמד לכספם קמוש יירשם חוח באהליהם

⁷ז באו ימי הפקדה באו ימי השלם--ידעו ישראל אויל הנביא משגע איש הרוח--על רב עונך ורבה משטמה

⁸ח צפה אפרים עם אלהי נביא פח יקוש על כל דרכיו--משטמה בבית אלהיו

⁹ט העמיקו שחתו כימי הגבעה יזכור עונם יפקוד חטאותם {ס}

¹⁰י כענבים במדבר מצאתי ישראל--כבכורה בתאנה בראשיתה ראיתי אבותיכם המה באו בעל פעור וינזרו לבשת ויהיו שקוצים כאהבם

¹¹יא אפרים כעוף יתעופף כבודם מלדה ומבטן ומהריון

¹²יב כי אם יגדלו את בניהם ושכלתים מאדם כי גם אוי להם בשורי מהם

¹³יג אפרים כאשר ראיתי לצור שתולה בנוה ואפרים להוציא אל הרג בניו

¹⁴יד תן להם יהוה מה תתן תן להם רחם משכיל ושדים צמקים

¹⁵טו כל רעתם בגלגל כי שם שנאתים על רע מעלליהם מביתי אגרשם לא אוסף אהבתם כל שריהם סררים

¹⁶טז הכה אפרים--שרשם יבש פרי בלי (בל) יעשון גם כי ילדון והמתי מחמדי בטנם

¹⁷יז ימאסם אלהי כי לא שמעו לו ויהיו נדדים בגוים {ס}