Read כֶּתֶר אֲרָם צוֹבָא - Tanah Aleppo Codex יואל 1 Bible Online

יואל 1 - כֶּתֶר אֲרָם צוֹבָא - Tanah Aleppo Codex bible

יואל 1

¹א דבר יהוה אשר היה אל יואל בן פתואל

²ב שמעו זאת הזקנים והאזינו כל יושבי הארץ ההיתה זאת בימיכם ואם בימי אבתיכם

³ג עליה לבניכם ספרו ובניכם לבניהם ובניהם לדור אחר

⁴ד יתר הגזם אכל הארבה ויתר הארבה אכל הילק ויתר הילק אכל החסיל

⁵ה הקיצו שכורים ובכו והיללו כל שתי יין על עסיס כי נכרת מפיכם

⁶ו כי גוי עלה על ארצי עצום ואין מספר שניו שני אריה ומתלעות לביא לו

⁷ז שם גפני לשמה ותאנתי לקצפה חשף חשפה והשליך הלבינו שריגיה

⁸ח אלי כבתולה חגרת שק על בעל נעוריה

⁹ט הכרת מנחה ונסך מבית יהוה אבלו הכהנים משרתי יהוה

¹⁰י שדד שדה אבלה אדמה כי שדד דגן הוביש תירוש אמלל יצהר

¹¹יא הבישו אכרים הילילו כרמים על חטה ועל שערה כי אבד קציר שדה

¹²יב הגפן הובישה והתאנה אמללה רמון גם תמר ותפוח כל עצי השדה יבשו--כי הביש ששון מן בני אדם {ס}

¹³יג חגרו וספדו הכהנים הילילו משרתי מזבח--באו לינו בשקים משרתי אלהי כי נמנע מבית אלהיכם מנחה ונסך

¹⁴יד קדשו צום קראו עצרה--אספו זקנים כל ישבי הארץ בית יהוה אלהיכם וזעקו אל יהוה

¹⁵טו אהה ליום כי קרוב יום יהוה וכשד משדי יבוא

¹⁶טז הלוא נגד עינינו אכל נכרת מבית אלהינו שמחה וגיל

¹⁷יז עבשו פרדות תחת מגרפתיהם--נשמו אצרות נהרסו ממגרות כי הביש דגן

¹⁸יח מה נאנחה בהמה נבכו עדרי בקר--כי אין מרעה להם גם עדרי הצאן נאשמו

¹⁹יט אליך יהוה אקרא כי אש אכלה נאות מדבר ולהבה להטה כל עצי השדה

²⁰כ גם בהמות שדה תערוג אליך כי יבשו אפיקי מים ואש אכלה נאות המדבר {ס}