Read כֶּתֶר אֲרָם צוֹבָא - Tanah Aleppo Codex יואל 2 Bible Online

יואל 2 - כֶּתֶר אֲרָם צוֹבָא - Tanah Aleppo Codex bible

יואל 2

¹א תקעו שופר בציון והריעו בהר קדשי--ירגזו כל ישבי הארץ כי בא יום יהוה כי קרוב

²ב יום חשך ואפלה יום ענן וערפל כשחר פרש על ההרים עם רב ועצום--כמהו לא נהיה מן העולם ואחריו לא יוסף עד שני דור ודור

³ג לפניו אכלה אש ואחריו תלהט להבה כגן עדן הארץ לפניו ואחריו מדבר שממה וגם פליטה לא היתה לו

⁴ד כמראה סוסים מראהו וכפרשים כן ירוצון

⁵ה כקול מרכבות על ראשי ההרים ירקדון--כקול להב אש אכלה קש כעם עצום ערוך מלחמה

⁶ו מפניו יחילו עמים כל פנים קבצו פארור

⁷ז כגבורים ירצון כאנשי מלחמה יעלו חומה ואיש בדרכיו ילכון ולא יעבטון ארחותם

⁸ח ואיש אחיו לא ידחקון גבר במסלתו ילכון ובעד השלח יפלו לא יבצעו

⁹ט בעיר ישקו בחומה ירצון--בבתים יעלו בעד החלונים יבאו כגנב

¹⁰י לפניו רגזה ארץ רעשו שמים שמש וירח קדרו וכוכבים אספו נגהם

¹¹יא ויהוה נתן קולו לפני חילו--כי רב מאד מחנהו כי עצום עשה דברו כי גדול יום יהוה ונורא מאד ומי יכילנו

¹²יב וגם עתה נאם יהוה שבו עדי בכל לבבכם ובצום ובבכי ובמספד

¹³יג וקרעו לבבכם ואל בגדיכם ושובו אל יהוה אלהיכם כי חנון ורחום הוא--ארך אפים ורב חסד ונחם על הרעה

¹⁴יד מי יודע ישוב ונחם והשאיר אחריו ברכה--מנחה ונסך ליהוה אלהיכם {פ}

¹⁵טו תקעו שופר בציון קדשו צום קראו עצרה

¹⁶טז אספו עם קדשו קהל קבצו זקנים--אספו עוללים וינקי שדים יצא חתן מחדרו וכלה מחפתה

¹⁷יז בין האולם ולמזבח יבכו הכהנים משרתי יהוה ויאמרו חוסה יהוה על עמך ואל תתן נחלתך לחרפה למשל בם גוים--למה יאמרו בעמים איה אלהיהם

¹⁸יח ויקנא יהוה לארצו ויחמל על עמו

¹⁹יט ויען יהוה ויאמר לעמו הנני שלח לכם את הדגן והתירוש והיצהר ושבעתם אתו ולא אתן אתכם עוד חרפה בגוים

²⁰כ ואת הצפוני ארחיק מעליכם והדחתיו אל ארץ ציה ושממה--את פניו אל הים הקדמני וספו אל הים האחרון ועלה באשו ותעל צחנתו--כי הגדיל לעשות

²¹כא אל תיראי אדמה גילי ושמחי כי הגדיל יהוה לעשות

²²כב אל תיראו בהמות שדי כי דשאו נאות מדבר כי עץ נשא פריו תאנה וגפן נתנו חילם

²³כג ובני ציון גילו ושמחו ביהוה אלהיכם כי נתן לכם את המורה לצדקה ויורד לכם גשם מורה ומלקוש--בראשון

²⁴כד ומלאו הגרנות בר והשיקו היקבים תירוש ויצהר

²⁵כה ושלמתי לכם את השנים אשר אכל הארבה הילק והחסיל והגזם חילי הגדול אשר שלחתי בכם

²⁶כו ואכלתם אכול ושבוע והללתם את שם יהוה אלהיכם אשר עשה עמכם להפליא ולא יבשו עמי לעולם

²⁷כז וידעתם כי בקרב ישראל אני ואני יהוה אלהיכם ואין עוד ולא יבשו עמי לעולם {פ}