Read כֶּתֶר אֲרָם צוֹבָא - Tanah Aleppo Codex עמוס 1 Bible Online

עמוס 1 - כֶּתֶר אֲרָם צוֹבָא - Tanah Aleppo Codex bible

עמוס 1

¹א דברי עמוס אשר היה בנקדים מתקוע אשר חזה על ישראל בימי עזיה מלך יהודה ובימי ירבעם בן יואש מלך ישראל--שנתים לפני הרעש

²ב ויאמר--יהוה מציון ישאג ומירושלם יתן קולו ואבלו נאות הרעים ויבש ראש הכרמל {פ}

³ג כה אמר יהוה על שלשה פשעי דמשק ועל ארבעה לא אשיבנו על דושם בחרצות הברזל את הגלעד

⁴ד ושלחתי אש בבית חזאל ואכלה ארמנות בן הדד

⁵ה ושברתי בריח דמשק והכרתי יושב מבקעת און ותומך שבט מבית עדן וגלו עם ארם קירה אמר יהוה {פ}

⁶ו כה אמר יהוה על שלשה פשעי עזה ועל ארבעה לא אשיבנו על הגלותם גלות שלמה להסגיר לאדום

⁷ז ושלחתי אש בחומת עזה ואכלה ארמנתיה

⁸ח והכרתי יושב מאשדוד ותומך שבט מאשקלון והשיבותי ידי על עקרון ואבדו שארית פלשתים--אמר אדני יהוה {פ}

⁹ט כה אמר יהוה על שלשה פשעי צר ועל ארבעה לא אשיבנו על הסגירם גלות שלמה לאדום ולא זכרו ברית אחים

¹⁰י ושלחתי אש בחומת צר ואכלה ארמנותיה {פ}

¹¹יא כה אמר יהוה על שלשה פשעי אדום ועל ארבעה לא אשיבנו על רדפו בחרב אחיו ושחת רחמיו ויטרף לעד אפו ועברתו שמרה נצח

¹²יב ושלחתי אש בתימן ואכלה ארמנות בצרה {פ}

¹³יג כה אמר יהוה על שלשה פשעי בני עמון ועל ארבעה לא אשיבנו על בקעם הרות הגלעד למען הרחיב את גבולם

¹⁴יד והצתי אש בחומת רבה ואכלה ארמנותיה בתרועה ביום מלחמה בסער ביום סופה

¹⁵טו והלך מלכם בגולה הוא ושריו יחדו אמר יהוה {פ}