Read כֶּתֶר אֲרָם צוֹבָא - Tanah Aleppo Codex עמוס 2 Bible Online

עמוס 2 - כֶּתֶר אֲרָם צוֹבָא - Tanah Aleppo Codex bible

עמוס 2

¹א כה אמר יהוה על שלשה פשעי מואב ועל ארבעה לא אשיבנו על שרפו עצמות מלך אדום לשיד

²ב ושלחתי אש במואב ואכלה ארמנות הקריות ומת בשאון מואב בתרועה בקול שופר

³ג והכרתי שופט מקרבה וכל שריה אהרוג עמו אמר יהוה {פ}

⁴ד כה אמר יהוה על שלשה פשעי יהודה ועל ארבעה לא אשיבנו על מאסם את תורת יהוה וחקיו לא שמרו ויתעום כזביהם אשר הלכו אבותם אחריהם

⁵ה ושלחתי אש ביהודה ואכלה ארמנות ירושלם {פ}

⁶ו כה אמר יהוה על שלשה פשעי ישראל ועל ארבעה לא אשיבנו על מכרם בכסף צדיק ואביון בעבור נעלים

⁷ז השאפים על עפר ארץ בראש דלים ודרך ענוים יטו ואיש ואביו ילכו אל הנערה למען חלל את שם קדשי

⁸ח ועל בגדים חבלים יטו אצל כל מזבח ויין ענושים ישתו בית אלהיהם

⁹ט ואנכי השמדתי את האמרי מפניהם אשר כגבה ארזים גבהו וחסן הוא כאלונים ואשמיד פריו ממעל ושרשיו מתחת

¹⁰י ואנכי העליתי אתכם מארץ מצרים ואולך אתכם במדבר ארבעים שנה לרשת את ארץ האמרי

¹¹יא ואקים מבניכם לנביאים ומבחוריכם לנזרים האף אין זאת בני ישראל נאם יהוה

¹²יב ותשקו את הנזרים יין ועל הנביאים צויתם לאמר לא תנבאו

¹³יג הנה אנכי מעיק תחתיכם כאשר תעיק העגלה המלאה לה עמיר

¹⁴יד ואבד מנוס מקל וחזק לא יאמץ כחו וגבור לא ימלט נפשו

¹⁵טו ותפש הקשת לא יעמד וקל ברגליו לא ימלט ורכב הסוס לא ימלט נפשו

¹⁶טז ואמיץ לבו בגבורים--ערום ינוס ביום ההוא נאם יהוה {פ}