Read כֶּתֶר אֲרָם צוֹבָא - Tanah Aleppo Codex עמוס 3 Bible Online

עמוס 3 - כֶּתֶר אֲרָם צוֹבָא - Tanah Aleppo Codex bible

עמוס 3

¹א שמעו את הדבר הזה אשר דבר יהוה עליכם--בני ישראל על כל המשפחה אשר העליתי מארץ מצרים לאמר

²ב רק אתכם ידעתי מכל משפחות האדמה על כן אפקד עליכם את כל עונתיכם

³ג הילכו שנים יחדו בלתי אם נועדו

⁴ד הישאג אריה ביער וטרף אין לו היתן כפיר קולו ממענתו בלתי אם לכד

⁵ה התפל צפור על פח הארץ ומוקש אין לה היעלה פח מן האדמה ולכוד לא ילכוד

⁶ו אם יתקע שופר בעיר ועם לא יחרדו אם תהיה רעה בעיר ויהוה לא עשה

⁷ז כי לא יעשה אדני יהוה דבר כי אם גלה סודו אל עבדיו הנביאים

⁸ח אריה שאג מי לא יירא אדני יהוה דבר מי לא ינבא

⁹ט השמיעו על ארמנות באשדוד ועל ארמנות בארץ מצרים ואמרו האספו על הרי שמרון וראו מהומת רבות בתוכה ועשוקים בקרבה

¹⁰י ולא ידעו עשות נכחה נאם יהוה האוצרים חמס ושד בארמנותיהם {פ}

¹¹יא לכן כה אמר אדני יהוה צר וסביב הארץ והוריד ממך עזך ונבזו ארמנותיך

¹²יב כה אמר יהוה כאשר יציל הרעה מפי הארי שתי כרעים או בדל אזן--כן ינצלו בני ישראל הישבים בשמרון בפאת מטה ובדמשק ערש

¹³יג שמעו והעידו בבית יעקב--נאם אדני יהוה אלהי הצבאות

¹⁴יד כי ביום פקדי פשעי ישראל--עליו ופקדתי על מזבחות בית אל ונגדעו קרנות המזבח ונפלו לארץ

¹⁵טו והכיתי בית החרף על בית הקיץ ואבדו בתי השן וספו בתים רבים--נאם יהוה {ס}