Read כֶּתֶר אֲרָם צוֹבָא - Tanah Aleppo Codex עמוס 5 Bible Online

עמוס 5 - כֶּתֶר אֲרָם צוֹבָא - Tanah Aleppo Codex bible

עמוס 5

¹א שמעו את הדבר הזה אשר אנכי נשא עליכם קינה--בית ישראל

²ב נפלה לא תוסיף קום בתולת ישראל נטשה על אדמתה אין מקימה

³ג כי כה אמר אדני יהוה העיר היצאת אלף תשאיר מאה והיוצאת מאה תשאיר עשרה לבית ישראל

⁴ד כי כה אמר יהוה לבית ישראל דרשוני וחיו

⁵ה ואל תדרשו בית אל והגלגל לא תבאו ובאר שבע לא תעברו כי הגלגל גלה יגלה ובית אל יהיה לאון

⁶ו דרשו את יהוה וחיו פן יצלח כאש בית יוסף ואכלה ואין מכבה לבית אל

⁷ז ההפכים ללענה משפט וצדקה לארץ הניחו

⁸ח עשה כימה וכסיל והפך לבקר צלמות ויום לילה החשיך הקורא למי הים וישפכם על פני הארץ--יהוה שמו

⁹ט המבליג שד על עז ושד על מבצר יבוא

¹⁰י שנאו בשער מוכיח ודבר תמים יתעבו

¹¹יא לכן יען בושסכם על דל ומשאת בר תקחו ממנו--בתי גזית בניתם ולא תשבו בם כרמי חמד נטעתם ולא תשתו את יינם

¹²יב כי ידעתי רבים פשעיכם ועצמים חטאתיכם צררי צדיק לקחי כפר ואביונים בשער הטו

¹³יג לכן המשכיל בעת ההיא--ידם כי עת רעה היא

¹⁴יד דרשו טוב ואל רע למען תחיו ויהי כן יהוה אלהי צבאות אתכם--כאשר אמרתם

¹⁵טו שנאו רע ואהבו טוב והציגו בשער משפט אולי יחנן יהוה אלהי צבאות--שארית יוסף {ס}

¹⁶טז לכן כה אמר יהוה אלהי צבאות אדני בכל רחבות מספד ובכל חוצות יאמרו הו הו וקראו אכר אל אבל ומספד אל יודעי נהי

¹⁷יז ובכל כרמים מספד כי אעבר בקרבך אמר יהוה {פ}

¹⁸יח הוי המתאוים את יום יהוה למה זה לכם יום יהוה הוא חשך ולא אור

¹⁹יט כאשר ינוס איש מפני הארי ופגעו הדב ובא הבית--וסמך ידו על הקיר ונשכו הנחש

²⁰כ הלא חשך יום יהוה ולא אור ואפל ולא נגה לו

²¹כא שנאתי מאסתי חגיכם ולא אריח בעצרתיכם

²²כב כי אם תעלו לי עלות ומנחתיכם לא ארצה ושלם מריאיכם לא אביט

²³כג הסר מעלי המון שריך וזמרת נבליך לא אשמע

²⁴כד ויגל כמים משפט וצדקה כנחל איתן

²⁵כה הזבחים ומנחה הגשתם לי במדבר ארבעים שנה--בית ישראל

²⁶כו ונשאתם את סכות מלככם ואת כיון צלמיכם--כוכב אלהיכם אשר עשיתם לכם

²⁷כז והגליתי אתכם מהלאה לדמשק אמר יהוה אלהי צבאות שמו {פ}