Read כֶּתֶר אֲרָם צוֹבָא - Tanah Aleppo Codex עמוס 6 Bible Online

עמוס 6 - כֶּתֶר אֲרָם צוֹבָא - Tanah Aleppo Codex bible

עמוס 6

¹א הוי השאננים בציון והבטחים בהר שמרון נקבי ראשית הגוים ובאו להם בית ישראל

²ב עברו כלנה וראו ולכו משם חמת רבה ורדו גת פלשתים הטובים מן הממלכות האלה--אם רב גבולם מגבלכם

³ג המנדים ליום רע ותגשון שבת חמס

⁴ד השכבים על מטות שן וסרחים על ערשותם ואכלים כרים מצאן ועגלים מתוך מרבק

⁵ה הפרטים על פי הנבל כדויד חשבו להם כלי שיר

⁶ו השתים במזרקי יין וראשית שמנים ימשחו ולא נחלו על שבר יוסף

⁷ז לכן עתה יגלו בראש גלים וסר מרזח סרוחים

⁸ח נשבע אדני יהוה בנפשו נאם יהוה אלהי צבאות מתאב אנכי את גאון יעקב וארמנתיו שנאתי והסגרתי עיר ומלאה

⁹ט והיה אם יותרו עשרה אנשים בבית אחד--ומתו

¹⁰י ונשאו דודו ומסרפו להוציא עצמים מן הבית ואמר לאשר בירכתי הבית העוד עמך ואמר אפס ואמר הס כי לא להזכיר בשם יהוה {ס}

¹¹יא כי הנה יהוה מצוה והכה הבית הגדול רסיסים והבית הקטן בקעים

¹²יב הירצון בסלע סוסים אם יחרוש בבקרים כי הפכתם לראש משפט ופרי צדקה ללענה

¹³יג השמחים ללא דבר האמרים--הלוא בחזקנו לקחנו לנו קרנים

¹⁴יד כי הנני מקים עליכם בית ישראל נאם יהוה אלהי הצבאות--גוי ולחצו אתכם מלבוא חמת עד נחל הערבה {פ}