Read כֶּתֶר אֲרָם צוֹבָא - Tanah Aleppo Codex עמוס 8 Bible Online

עמוס 8 - כֶּתֶר אֲרָם צוֹבָא - Tanah Aleppo Codex bible

עמוס 8

¹א כה הראני אדני יהוה והנה כלוב קיץ

²ב ויאמר מה אתה ראה עמוס ואמר כלוב קיץ ויאמר יהוה אלי בא הקץ אל עמי ישראל--לא אוסיף עוד עבור לו

³ג והילילו שירות היכל ביום ההוא--נאם אדני יהוה רב הפגר בכל מקום השליך הס {פ}

⁴ד שמעו זאת השאפים אביון ולשבית ענוי (עניי) ארץ

⁵ה לאמר מתי יעבר החדש ונשבירה שבר והשבת ונפתחה בר--להקטין איפה ולהגדיל שקל ולעות מאזני מרמה

⁶ו לקנות בכסף דלים ואביון בעבור נעלים ומפל בר נשביר

⁷ז נשבע יהוה בגאון יעקב אם אשכח לנצח כל מעשיהם

⁸ח העל זאת לא תרגז הארץ ואבל כל יושב בה ועלתה כאר כלה ונגרשה ונשקה (ונשקעה) כיאור מצרים {פ}

⁹ט והיה ביום ההוא נאם אדני יהוה והבאתי השמש בצהרים והחשכתי לארץ ביום אור

¹⁰י והפכתי חגיכם לאבל וכל שיריכם לקינה והעליתי על כל מתנים שק ועל כל ראש קרחה ושמתיה כאבל יחיד ואחריתה כיום מר {פ}

¹¹יא הנה ימים באים נאם אדני יהוה והשלחתי רעב בארץ לא רעב ללחם ולא צמא למים--כי אם לשמע את דברי יהוה

¹²יב ונעו מים עד ים ומצפון ועד מזרח ישוטטו לבקש את דבר יהוה ולא ימצאו

¹³יג ביום ההוא תתעלפנה הבתולת היפות והבחורים--בצמא

¹⁴יד הנשבעים באשמת שמרון ואמרו חי אלהיך דן וחי דרך באר שבע ונפלו ולא יקומו עוד {ס}