Read כֶּתֶר אֲרָם צוֹבָא - Tanah Aleppo Codex עבדיה 1 Bible Online

עבדיה 1 - כֶּתֶר אֲרָם צוֹבָא - Tanah Aleppo Codex bible

עבדיה 1

¹א חזון עבדיה כה אמר אדני יהוה לאדום שמועה שמענו מאת יהוה וציר בגוים שלח--קומו ונקומה עליה למלחמה

²ב הנה קטן נתתיך בגוים בזוי אתה מאד

³ג זדון לבך השיאך שכני בחגוי סלע מרום שבתו אמר בלבו מי יורדני ארץ

⁴ד אם תגביה כנשר ואם בין כוכבים שים קנך--משם אורידך נאם יהוה

⁵ה אם גנבים באו לך אם שודדי לילה--איך נדמיתה הלוא יגנבו דים אם בצרים באו לך הלוא ישאירו עללות

⁶ו איך נחפשו עשו נבעו מצפניו

⁷ז עד הגבול שלחוך כל אנשי בריתך--השיאוך יכלו לך אנשי שלמך לחמך ישימו מזור תחתיך--אין תבונה בו

⁸ח הלוא ביום ההוא נאם יהוה והאבדתי חכמים מאדום ותבונה מהר עשו

⁹ט וחתו גבוריך תימן למען יכרת איש מהר עשו מקטל

¹⁰י מחמס אחיך יעקב תכסך בושה ונכרת לעולם

¹¹יא ביום עמדך מנגד ביום שבות זרים חילו ונכרים באו שערו ועל ירושלם ידו גורל--גם אתה כאחד מהם

¹²יב ואל תרא ביום אחיך ביום נכרו ואל תשמח לבני יהודה ביום אבדם ואל תגדל פיך ביום צרה

¹³יג אל תבוא בשער עמי ביום אידם אל תרא גם אתה ברעתו ביום אידו ואל תשלחנה בחילו ביום אידו

¹⁴יד ואל תעמד על הפרק להכרית את פליטיו ואל תסגר שרידיו ביום צרה

¹⁵טו כי קרוב יום יהוה על כל הגוים כאשר עשית יעשה לך גמלך ישוב בראשך

¹⁶טז כי כאשר שתיתם על הר קדשי ישתו כל הגוים תמיד ושתו ולעו והיו כלוא היו

¹⁷יז ובהר ציון תהיה פליטה והיה קדש וירשו בית יעקב את מורשיהם

¹⁸יח והיה בית יעקב אש ובית יוסף להבה ובית עשו לקש ודלקו בהם ואכלום ולא יהיה שריד לבית עשו כי יהוה דבר

¹⁹יט וירשו הנגב את הר עשו והשפלה את פלשתים וירשו את שדה אפרים ואת שדה שמרון ובנימן את הגלעד

²⁰כ וגלת החל הזה לבני ישראל אשר כנענים עד צרפת וגלת ירושלם אשר בספרד--ירשו את ערי הנגב

²¹כא ועלו מושעים בהר ציון לשפט את הר עשו והיתה ליהוה המלוכה {ש}