Read כֶּתֶר אֲרָם צוֹבָא - Tanah Aleppo Codex יונה 1 Bible Online

יונה 1 - כֶּתֶר אֲרָם צוֹבָא - Tanah Aleppo Codex bible

יונה 1

¹א ויהי דבר יהוה אל יונה בן אמתי לאמר

²ב קום לך אל נינוה העיר הגדולה--וקרא עליה כי עלתה רעתם לפני

³ג ויקם יונה לברח תרשישה מלפני יהוה וירד יפו וימצא אניה באה תרשיש ויתן שכרה וירד בה לבוא עמהם תרשישה מלפני יהוה

⁴ד ויהוה הטיל רוח גדולה אל הים ויהי סער גדול בים והאניה חשבה להשבר

⁵ה וייראו המלחים ויזעקו איש אל אלהיו ויטלו את הכלים אשר באניה אל הים להקל מעליהם ויונה ירד אל ירכתי הספינה וישכב וירדם

⁶ו ויקרב אליו רב החבל ויאמר לו מה לך נרדם קום קרא אל אלהיך--אולי יתעשת האלהים לנו ולא נאבד

⁷ז ויאמרו איש אל רעהו לכו ונפילה גורלות ונדעה בשלמי הרעה הזאת לנו ויפלו גורלות ויפל הגורל על יונה

⁸ח ויאמרו אליו--הגידה נא לנו באשר למי הרעה הזאת לנו מה מלאכתך ומאין תבוא--מה ארצך ואי מזה עם אתה

⁹ט ויאמר אליהם עברי אנכי ואת יהוה אלהי השמים אני ירא אשר עשה את הים ואת היבשה

¹⁰י וייראו האנשים יראה גדולה ויאמרו אליו מה זאת עשית כי ידעו האנשים כי מלפני יהוה הוא ברח--כי הגיד להם

¹¹יא ויאמרו אליו מה נעשה לך וישתק הים מעלינו כי הים הולך וסער

¹²יב ויאמר אליהם שאוני והטילני אל הים וישתק הים מעליכם כי יודע אני כי בשלי הסער הגדול הזה עליכם

¹³יג ויחתרו האנשים להשיב אל היבשה--ולא יכלו כי הים הולך וסער עליהם

¹⁴יד ויקראו אל יהוה ויאמרו אנה יהוה אל נא נאבדה בנפש האיש הזה ואל תתן עלינו דם נקיא כי אתה יהוה כאשר חפצת עשית

¹⁵טו וישאו את יונה ויטלהו אל הים ויעמד הים מזעפו

¹⁶טז וייראו האנשים יראה גדולה את יהוה ויזבחו זבח ליהוה וידרו נדרים