Read כֶּתֶר אֲרָם צוֹבָא - Tanah Aleppo Codex יונה 4 Bible Online

יונה 4 - כֶּתֶר אֲרָם צוֹבָא - Tanah Aleppo Codex bible

יונה 4

¹א וירע אל יונה רעה גדולה ויחר לו

²ב ויתפלל אל יהוה ויאמר אנה יהוה הלוא זה דברי עד היותי על אדמתי--על כן קדמתי לברח תרשישה כי ידעתי כי אתה אל חנון ורחום ארך אפים ורב חסד ונחם על הרעה

³ג ועתה יהוה קח נא את נפשי ממני כי טוב מותי מחיי {ס}

⁴ד ויאמר יהוה ההיטב חרה לך

⁵ה ויצא יונה מן העיר וישב מקדם לעיר ויעש לו שם סכה וישב תחתיה בצל עד אשר יראה מה יהיה בעיר

⁶ו וימן יהוה אלהים קיקיון ויעל מעל ליונה להיות צל על ראשו להציל לו מרעתו וישמח יונה על הקיקיון שמחה גדולה

⁷ז וימן האלהים תולעת בעלות השחר למחרת ותך את הקיקיון וייבש

⁸ח ויהי כזרח השמש וימן אלהים רוח קדים חרישית ותך השמש על ראש יונה ויתעלף וישאל את נפשו למות ויאמר טוב מותי מחיי

⁹ט ויאמר אלהים אל יונה ההיטב חרה לך על הקיקיון ויאמר היטב חרה לי עד מות

¹⁰י ויאמר יהוה--אתה חסת על הקיקיון אשר לא עמלת בו ולא גדלתו שבן לילה היה ובן לילה אבד

¹¹יא ואני לא אחוס על נינוה העיר הגדולה--אשר יש בה הרבה משתים עשרה רבו אדם אשר לא ידע בין ימינו לשמאלו ובהמה רבה {ש}