Read כֶּתֶר אֲרָם צוֹבָא - Tanah Aleppo Codex במדבר 10 Bible Online

במדבר 10 - כֶּתֶר אֲרָם צוֹבָא - Tanah Aleppo Codex bible

במדבר 10

¹א וידבר יהוה אל משה לאמר

²ב עשה לך שתי חצוצרת כסף--מקשה תעשה אתם והיו לך למקרא העדה ולמסע את המחנות

³ג ותקעו בהן--ונועדו אליך כל העדה אל פתח אהל מועד

⁴ד ואם באחת יתקעו--ונועדו אליך הנשיאים ראשי אלפי ישראל

⁵ה ותקעתם תרועה--ונסעו המחנות החנים קדמה

⁶ו ותקעתם תרועה שנית--ונסעו המחנות החנים תימנה תרועה יתקעו למסעיהם

⁷ז ובהקהיל את הקהל--תתקעו ולא תריעו

⁸ח ובני אהרן הכהנים יתקעו בחצצרות והיו לכם לחקת עולם לדרתיכם

⁹ט וכי תבאו מלחמה בארצכם על הצר הצרר אתכם--והרעתם בחצצרת ונזכרתם לפני יהוה אלהיכם ונושעתם מאיביכם

¹⁰י וביום שמחתכם ובמועדיכם ובראשי חדשיכם--ותקעתם בחצצרת על עלתיכם ועל זבחי שלמיכם והיו לכם לזכרון לפני אלהיכם אני יהוה אלהיכם {פ}

¹¹יא ויהי בשנה השנית בחדש השני--בעשרים בחדש נעלה הענן מעל משכן העדת

¹²יב ויסעו בני ישראל למסעיהם ממדבר סיני וישכן הענן במדבר פארן

¹³יג ויסעו בראשנה על פי יהוה ביד משה

¹⁴יד ויסע דגל מחנה בני יהודה בראשנה--לצבאתם ועל צבאו--נחשון בן עמינדב

¹⁵טו ועל צבא--מטה בני יששכר נתנאל בן צוער

¹⁶טז ועל צבא--מטה בני זבולן אליאב בן חלן

¹⁷יז והורד המשכן ונסעו בני גרשון ובני מררי נשאי המשכן

¹⁸יח ונסע דגל מחנה ראובן--לצבאתם ועל צבאו--אליצור בן שדיאור

¹⁹יט ועל צבא--מטה בני שמעון שלמיאל בן צורישדי

²⁰כ ועל צבא מטה בני גד אליסף בן דעואל

²¹כא ונסעו הקהתים נשאי המקדש והקימו את המשכן עד באם

²²כב ונסע דגל מחנה בני אפרים--לצבאתם ועל צבאו--אלישמע בן עמיהוד

²³כג ועל צבא--מטה בני מנשה גמליאל בן פדהצור

²⁴כד ועל צבא--מטה בני בנימן אבידן בן גדעוני

²⁵כה ונסע דגל מחנה בני דן--מאסף לכל המחנת לצבאתם ועל צבאו--אחיעזר בן עמישדי

²⁶כו ועל צבא--מטה בני אשר פגעיאל בן עכרן

²⁷כז ועל צבא--מטה בני נפתלי אחירע בן עינן

²⁸כח אלה מסעי בני ישראל לצבאתם ויסעו {ס}

²⁹כט ויאמר משה לחבב בן רעואל המדיני חתן משה נסעים אנחנו אל המקום אשר אמר יהוה אתו אתן לכם לכה אתנו והטבנו לך כי יהוה דבר טוב על ישראל

³⁰ל ויאמר אליו לא אלך כי אם אל ארצי ואל מולדתי אלך

³¹לא ויאמר אל נא תעזב אתנו כי על כן ידעת חנתנו במדבר והיית לנו לעינים

³²לב והיה כי תלך עמנו והיה הטוב ההוא אשר ייטיב יהוה עמנו--והטבנו לך

³³לג ויסעו מהר יהוה דרך שלשת ימים וארון ברית יהוה נסע לפניהם דרך שלשת ימים לתור להם מנוחה

³⁴לד וענן יהוה עליהם יומם בנסעם מן המחנה {ס} ] {ס}

³⁵לה ויהי בנסע הארן ויאמר משה קומה יהוה ויפצו איביך וינסו משנאיך מפניך

³⁶לו ובנחה יאמר שובה יהוה רבבות אלפי ישראל {ס} ] {פ}