Read כֶּתֶר אֲרָם צוֹבָא - Tanah Aleppo Codex במדבר 12 Bible Online

במדבר 12 - כֶּתֶר אֲרָם צוֹבָא - Tanah Aleppo Codex bible

במדבר 12

¹א ותדבר מרים ואהרן במשה על אדות האשה הכשית אשר לקח כי אשה כשית לקח

²ב ויאמרו הרק אך במשה דבר יהוה--הלא גם בנו דבר וישמע יהוה

³ג והאיש משה ענו מאד--מכל האדם אשר על פני האדמה {ס}

⁴ד ויאמר יהוה פתאם אל משה ואל אהרן ואל מרים צאו שלשתכם אל אהל מועד ויצאו שלשתם

⁵ה וירד יהוה בעמוד ענן ויעמד פתח האהל ויקרא אהרן ומרים ויצאו שניהם

⁶ו ויאמר שמעו נא דברי אם יהיה נביאכם--יהוה במראה אליו אתודע בחלום אדבר בו

⁷ז לא כן עבדי משה בכל ביתי נאמן הוא

⁸ח פה אל פה אדבר בו ומראה ולא בחידת ותמנת יהוה יביט ומדוע לא יראתם לדבר בעבדי במשה

⁹ט ויחר אף יהוה בם וילך

¹⁰י והענן סר מעל האהל והנה מרים מצרעת כשלג ויפן אהרן אל מרים והנה מצרעת

¹¹יא ויאמר אהרן אל משה בי אדני--אל נא תשת עלינו חטאת אשר נואלנו ואשר חטאנו

¹²יב אל נא תהי כמת אשר בצאתו מרחם אמו ויאכל חצי בשרו

¹³יג ויצעק משה אל יהוה לאמר אל נא רפא נא לה {פ}

¹⁴יד ויאמר יהוה אל משה ואביה ירק ירק בפניה--הלא תכלם שבעת ימים תסגר שבעת ימים מחוץ למחנה ואחר תאסף

¹⁵טו ותסגר מרים מחוץ למחנה שבעת ימים והעם לא נסע עד האסף מרים

¹⁶טז ואחר נסעו העם מחצרות ויחנו במדבר פארן {פ}