Read כֶּתֶר אֲרָם צוֹבָא - Tanah Aleppo Codex במדבר 13 Bible Online

במדבר 13 - כֶּתֶר אֲרָם צוֹבָא - Tanah Aleppo Codex bible

במדבר 13

¹א וידבר יהוה אל משה לאמר

²ב שלח לך אנשים ויתרו את ארץ כנען אשר אני נתן לבני ישראל איש אחד איש אחד למטה אבתיו תשלחו--כל נשיא בהם

³ג וישלח אתם משה ממדבר פארן על פי יהוה כלם אנשים ראשי בני ישראל המה

⁴ד ואלה שמותם למטה ראובן שמוע בן זכור

⁵ה למטה שמעון שפט בן חורי

⁶ו למטה יהודה כלב בן יפנה

⁷ז למטה יששכר יגאל בן יוסף

⁸ח למטה אפרים הושע בן נון

⁹ט למטה בנימן פלטי בן רפוא

¹⁰י למטה זבולן גדיאל בן סודי

¹¹יא למטה יוסף למטה מנשה--גדי בן סוסי

¹²יב למטה דן עמיאל בן גמלי

¹³יג למטה אשר סתור בן מיכאל

¹⁴יד למטה נפתלי נחבי בן ופסי

¹⁵טו למטה גד גאואל בן מכי

¹⁶טז אלה שמות האנשים אשר שלח משה לתור את הארץ ויקרא משה להושע בן נון יהושע

¹⁷יז וישלח אתם משה לתור את ארץ כנען ויאמר אלהם עלו זה בנגב ועליתם את ההר

¹⁸יח וראיתם את הארץ מה הוא ואת העם הישב עליה--החזק הוא הרפה המעט הוא אם רב

¹⁹יט ומה הארץ אשר הוא ישב בה--הטובה הוא אם רעה ומה הערים אשר הוא יושב בהנה--הבמחנים אם במבצרים

²⁰כ ומה הארץ השמנה הוא אם רזה היש בה עץ אם אין והתחזקתם ולקחתם מפרי הארץ והימים--ימי בכורי ענבים

²¹כא ויעלו ויתרו את הארץ ממדבר צן עד רחב לבא חמת

²²כב ויעלו בנגב ויבא עד חברון ושם אחימן ששי ותלמי ילידי הענק וחברון שבע שנים נבנתה לפני צען מצרים

²³כג ויבאו עד נחל אשכל ויכרתו משם זמורה ואשכול ענבים אחד וישאהו במוט בשנים ומן הרמנים ומן התאנים

²⁴כד למקום ההוא קרא נחל אשכול על אדות האשכול אשר כרתו משם בני ישראל

²⁵כה וישבו מתור הארץ מקץ ארבעים יום

²⁶כו וילכו ויבאו אל משה ואל אהרן ואל כל עדת בני ישראל אל מדבר פארן--קדשה וישיבו אתם דבר ואת כל העדה ויראום את פרי הארץ

²⁷כז ויספרו לו ויאמרו באנו אל הארץ אשר שלחתנו וגם זבת חלב ודבש הוא--וזה פריה

²⁸כח אפס כי עז העם הישב בארץ והערים בצרות גדלת מאד וגם ילדי הענק ראינו שם

²⁹כט עמלק יושב בארץ הנגב והחתי והיבוסי והאמרי יושב בהר והכנעני יושב על הים ועל יד הירדן

³⁰ל ויהס כלב את העם אל משה ויאמר עלה נעלה וירשנו אתה--כי יכול נוכל לה

³¹לא והאנשים אשר עלו עמו אמרו לא נוכל לעלות אל העם כי חזק הוא ממנו

³²לב ויציאו דבת הארץ אשר תרו אתה אל בני ישראל לאמר הארץ אשר עברנו בה לתור אתה ארץ אכלת יושביה הוא וכל העם אשר ראינו בתוכה אנשי מדות

³³לג ושם ראינו את הנפילים בני ענק--מן הנפלים ונהי בעינינו כחגבים וכן היינו בעיניהם