Read כֶּתֶר אֲרָם צוֹבָא - Tanah Aleppo Codex במדבר 15 Bible Online

במדבר 15 - כֶּתֶר אֲרָם צוֹבָא - Tanah Aleppo Codex bible

במדבר 15

¹א וידבר יהוה אל משה לאמר

²ב דבר אל בני ישראל ואמרת אלהם כי תבאו אל ארץ מושבתיכם אשר אני נתן לכם

³ג ועשיתם אשה ליהוה עלה או זבח לפלא נדר או בנדבה או במעדיכם--לעשות ריח ניחח ליהוה מן הבקר או מן הצאן

⁴ד והקריב המקריב קרבנו ליהוה--מנחה סלת עשרון בלול ברבעית ההין שמן

⁵ה ויין לנסך רביעית ההין תעשה על העלה או לזבח--לכבש האחד

⁶ו או לאיל תעשה מנחה סלת שני עשרנים בלולה בשמן שלשית ההין

⁷ז ויין לנסך שלשית ההין--תקריב ריח ניחח ליהוה

⁸ח וכי תעשה בן בקר עלה או זבח לפלא נדר או שלמים ליהוה

⁹ט והקריב על בן הבקר מנחה סלת שלשה עשרנים בלול בשמן חצי ההין

¹⁰י ויין תקריב לנסך חצי ההין--אשה ריח ניחח ליהוה

¹¹יא ככה יעשה לשור האחד או לאיל האחד או לשה בכבשים או בעזים

¹²יב כמספר אשר תעשו--ככה תעשו לאחד כמספרם

¹³יג כל האזרח יעשה ככה את אלה להקריב אשה ריח ניחח ליהוה

¹⁴יד וכי יגור אתכם גר או אשר בתוככם לדרתיכם ועשה אשה ריח ניחח ליהוה--כאשר תעשו כן יעשה

¹⁵טו הקהל חקה אחת לכם ולגר הגר חקת עולם לדרתיכם ככם כגר יהיה לפני יהוה

¹⁶טז תורה אחת ומשפט אחד יהיה לכם ולגר הגר אתכם {פ}

¹⁷יז וידבר יהוה אל משה לאמר

¹⁸יח דבר אל בני ישראל ואמרת אלהם בבאכם אל הארץ אשר אני מביא אתכם שמה

¹⁹יט והיה באכלכם מלחם הארץ--תרימו תרומה ליהוה

²⁰כ ראשית ערסתכם--חלה תרימו תרומה כתרומת גרן כן תרימו אתה

²¹כא מראשית ערסתיכם תתנו ליהוה תרומה--לדרתיכם {ס}

²²כב וכי תשגו--ולא תעשו את כל המצות האלה אשר דבר יהוה אל משה

²³כג את כל אשר צוה יהוה אליכם ביד משה מן היום אשר צוה יהוה והלאה--לדרתיכם

²⁴כד והיה אם מעיני העדה נעשתה לשגגה ועשו כל העדה פר בן בקר אחד לעלה לריח ניחח ליהוה ומנחתו ונסכו כמשפט ושעיר עזים אחד לחטת

²⁵כה וכפר הכהן על כל עדת בני ישראל--ונסלח להם כי שגגה הוא--והם הביאו את קרבנם אשה ליהוה וחטאתם לפני יהוה על שגגתם

²⁶כו ונסלח לכל עדת בני ישראל ולגר הגר בתוכם כי לכל העם בשגגה {ס}

²⁷כז ואם נפש אחת תחטא בשגגה--והקריבה עז בת שנתה לחטאת

²⁸כח וכפר הכהן על הנפש השגגת בחטאה בשגגה--לפני יהוה לכפר עליו ונסלח לו

²⁹כט האזרח בבני ישראל ולגר הגר בתוכם--תורה אחת יהיה לכם לעשה בשגגה

³⁰ל והנפש אשר תעשה ביד רמה מן האזרח ומן הגר--את יהוה הוא מגדף ונכרתה הנפש ההוא מקרב עמה

³¹לא כי דבר יהוה בזה ואת מצותו הפר הכרת תכרת הנפש ההוא עונה בה {פ}

³²לב ויהיו בני ישראל במדבר וימצאו איש מקשש עצים--ביום השבת

³³לג ויקריבו אתו המצאים אתו מקשש עצים--אל משה ואל אהרן ואל כל העדה

³⁴לד ויניחו אתו במשמר כי לא פרש מה יעשה לו {ס}

³⁵לה ויאמר יהוה אל משה מות יומת האיש רגום אתו באבנים כל העדה מחוץ למחנה

³⁶לו ויציאו אתו כל העדה אל מחוץ למחנה וירגמו אתו באבנים וימת כאשר צוה יהוה את משה {פ}

³⁷לז ויאמר יהוה אל משה לאמר

³⁸לח דבר אל בני ישראל ואמרת אלהם ועשו להם ציצת על כנפי בגדיהם לדרתם ונתנו על ציצת הכנף פתיל תכלת

³⁹לט והיה לכם לציצת וראיתם אתו וזכרתם את כל מצות יהוה ועשיתם אתם ולא תתורו אחרי לבבכם ואחרי עיניכם אשר אתם זנים אחריהם

⁴⁰מ למען תזכרו ועשיתם את כל מצותי והייתם קדשים לאלהיכם

⁴¹מא אני יהוה אלהיכם אשר הוצאתי אתכם מארץ מצרים להיות לכם לאלהים אני יהוה אלהיכם {פ}