Read כֶּתֶר אֲרָם צוֹבָא - Tanah Aleppo Codex במדבר 16 Bible Online

במדבר 16 - כֶּתֶר אֲרָם צוֹבָא - Tanah Aleppo Codex bible

במדבר 16

¹א ויקח קרח בן יצהר בן קהת בן לוי ודתן ואבירם בני אליאב ואון בן פלת--בני ראובן

²ב ויקמו לפני משה ואנשים מבני ישראל חמשים ומאתים נשיאי עדה קראי מועד אנשי שם

³ג ויקהלו על משה ועל אהרן ויאמרו אלהם רב לכם--כי כל העדה כלם קדשים ובתוכם יהוה ומדוע תתנשאו על קהל יהוה

⁴ד וישמע משה ויפל על פניו

⁵ה וידבר אל קרח ואל כל עדתו לאמר בקר וידע יהוה את אשר לו ואת הקדוש והקריב אליו ואת אשר יבחר בו יקריב אליו

⁶ו זאת עשו קחו לכם מחתות קרח וכל עדתו

⁷ז ותנו בהן אש ושימו עליהן קטרת לפני יהוה מחר והיה האיש אשר יבחר יהוה הוא הקדוש רב לכם בני לוי

⁸ח ויאמר משה אל קרח שמעו נא בני לוי

⁹ט המעט מכם כי הבדיל אלהי ישראל אתכם מעדת ישראל להקריב אתכם אליו--לעבד את עבדת משכן יהוה ולעמד לפני העדה לשרתם

¹⁰י ויקרב אתך ואת כל אחיך בני לוי אתך ובקשתם גם כהנה

¹¹יא לכן אתה וכל עדתך--הנעדים על יהוה ואהרן מה הוא כי תלונו (תלינו) עליו

¹²יב וישלח משה לקרא לדתן ולאבירם בני אליאב ויאמרו לא נעלה

¹³יג המעט כי העליתנו מארץ זבת חלב ודבש להמיתנו במדבר כי תשתרר עלינו גם השתרר

¹⁴יד אף לא אל ארץ זבת חלב ודבש הביאתנו ותתן לנו נחלת שדה וכרם העיני האנשים ההם תנקר--לא נעלה

¹⁵טו ויחר למשה מאד ויאמר אל יהוה אל תפן אל מנחתם לא חמור אחד מהם נשאתי ולא הרעתי את אחד מהם

¹⁶טז ויאמר משה אל קרח אתה וכל עדתך היו לפני יהוה אתה והם ואהרן מחר

¹⁷יז וקחו איש מחתתו ונתתם עליהם קטרת והקרבתם לפני יהוה איש מחתתו חמשים ומאתים מחתת ואתה ואהרן איש מחתתו

¹⁸יח ויקחו איש מחתתו ויתנו עליהם אש וישימו עליהם קטרת ויעמדו פתח אהל מועד--ומשה ואהרן

¹⁹יט ויקהל עליהם קרח את כל העדה אל פתח אהל מועד וירא כבוד יהוה אל כל העדה {ס}

²⁰כ וידבר יהוה אל משה ואל אהרן לאמר

²¹כא הבדלו מתוך העדה הזאת ואכלה אתם כרגע

²²כב ויפלו על פניהם ויאמרו אל אלהי הרוחת לכל בשר האיש אחד יחטא ועל כל העדה תקצף {ס}

²³כג וידבר יהוה אל משה לאמר

²⁴כד דבר אל העדה לאמר העלו מסביב למשכן קרח דתן ואבירם

²⁵כה ויקם משה וילך אל דתן ואבירם וילכו אחריו זקני ישראל

²⁶כו וידבר אל העדה לאמר סורו נא מעל אהלי האנשים הרשעים האלה ואל תגעו בכל אשר להם פן תספו בכל חטאתם

²⁷כז ויעלו מעל משכן קרח דתן ואבירם--מסביב ודתן ואבירם יצאו נצבים פתח אהליהם ונשיהם ובניהם וטפם

²⁸כח ויאמר משה בזאת תדעון כי יהוה שלחני לעשות את כל המעשים האלה כי לא מלבי

²⁹כט אם כמות כל האדם ימתון אלה ופקדת כל האדם יפקד עליהם--לא יהוה שלחני

³⁰ל ואם בריאה יברא יהוה ופצתה האדמה את פיה ובלעה אתם ואת כל אשר להם וירדו חיים שאלה--וידעתם כי נאצו האנשים האלה את יהוה

³¹לא ויהי ככלתו לדבר את כל הדברים האלה ותבקע האדמה אשר תחתיהם

³²לב ותפתח הארץ את פיה ותבלע אתם ואת בתיהם ואת כל האדם אשר לקרח ואת כל הרכוש

³³לג וירדו הם וכל אשר להם חיים--שאלה ותכס עליהם הארץ ויאבדו מתוך הקהל

³⁴לד וכל ישראל אשר סביבתיהם--נסו לקלם כי אמרו פן תבלענו הארץ

³⁵לה ואש יצאה מאת יהוה ותאכל את החמשים ומאתים איש מקריבי הקטרת {ס}