Read כֶּתֶר אֲרָם צוֹבָא - Tanah Aleppo Codex במדבר 19 Bible Online

במדבר 19 - כֶּתֶר אֲרָם צוֹבָא - Tanah Aleppo Codex bible

במדבר 19

¹א וידבר יהוה אל משה ואל אהרן לאמר

²ב זאת חקת התורה אשר צוה יהוה לאמר דבר אל בני ישראל ויקחו אליך פרה אדמה תמימה אשר אין בה מום אשר לא עלה עליה על

³ג ונתתם אתה אל אלעזר הכהן והוציא אתה אל מחוץ למחנה ושחט אתה לפניו

⁴ד ולקח אלעזר הכהן מדמה--באצבעו והזה אל נכח פני אהל מועד מדמה--שבע פעמים

⁵ה ושרף את הפרה לעיניו את ערה ואת בשרה ואת דמה על פרשה ישרף

⁶ו ולקח הכהן עץ ארז ואזוב--ושני תולעת והשליך אל תוך שרפת הפרה

⁷ז וכבס בגדיו הכהן ורחץ בשרו במים ואחר יבא אל המחנה וטמא הכהן עד הערב

⁸ח והשרף אתה--יכבס בגדיו במים ורחץ בשרו במים וטמא עד הערב

⁹ט ואסף איש טהור את אפר הפרה והניח מחוץ למחנה במקום טהור והיתה לעדת בני ישראל למשמרת למי נדה--חטאת הוא

¹⁰י וכבס האסף את אפר הפרה את בגדיו וטמא עד הערב והיתה לבני ישראל ולגר הגר בתוכם--לחקת עולם

¹¹יא הנגע במת לכל נפש אדם--וטמא שבעת ימים

¹²יב הוא יתחטא בו ביום השלישי וביום השביעי--יטהר ואם לא יתחטא ביום השלישי וביום השביעי--לא יטהר

¹³יג כל הנגע במת בנפש האדם אשר ימות ולא יתחטא את משכן יהוה טמא--ונכרתה הנפש ההוא מישראל כי מי נדה לא זרק עליו טמא יהיה--עוד טמאתו בו

¹⁴יד זאת התורה אדם כי ימות באהל כל הבא אל האהל וכל אשר באהל יטמא שבעת ימים

¹⁵טו וכל כלי פתוח אשר אין צמיד פתיל עליו--טמא הוא

¹⁶טז וכל אשר יגע על פני השדה בחלל חרב או במת או בעצם אדם או בקבר--יטמא שבעת ימים

¹⁷יז ולקחו לטמא מעפר שרפת החטאת ונתן עליו מים חיים אל כלי

¹⁸יח ולקח אזוב וטבל במים איש טהור והזה על האהל ועל כל הכלים ועל הנפשות אשר היו שם ועל הנגע בעצם או בחלל או במת או בקבר

¹⁹יט והזה הטהר על הטמא ביום השלישי וביום השביעי וחטאו ביום השביעי וכבס בגדיו ורחץ במים וטהר בערב

²⁰כ ואיש אשר יטמא ולא יתחטא ונכרתה הנפש ההוא מתוך הקהל כי את מקדש יהוה טמא מי נדה לא זרק עליו--טמא הוא

²¹כא והיתה להם לחקת עולם ומזה מי הנדה יכבס בגדיו והנגע במי הנדה יטמא עד הערב

²²כב וכל אשר יגע בו הטמא יטמא והנפש הנגעת תטמא עד הערב {פ}