Read כֶּתֶר אֲרָם צוֹבָא - Tanah Aleppo Codex במדבר 2 Bible Online

במדבר 2 - כֶּתֶר אֲרָם צוֹבָא - Tanah Aleppo Codex bible

במדבר 2

¹א וידבר יהוה אל משה ואל אהרן לאמר

²ב איש על דגלו באתת לבית אבתם יחנו בני ישראל מנגד סביב לאהל מועד יחנו

³ג והחנים קדמה מזרחה דגל מחנה יהודה לצבאתם ונשיא לבני יהודה נחשון בן עמינדב

⁴ד וצבאו ופקדיהם--ארבעה ושבעים אלף ושש מאות

⁵ה והחנים עליו מטה יששכר ונשיא לבני יששכר נתנאל בן צוער

⁶ו וצבאו ופקדיו--ארבעה וחמשים אלף וארבע מאות

⁷ז מטה זבולן ונשיא לבני זבולן אליאב בן חלן

⁸ח וצבאו ופקדיו--שבעה וחמשים אלף וארבע מאות

⁹ט כל הפקדים למחנה יהודה מאת אלף ושמנים אלף וששת אלפים וארבע מאות--לצבאתם ראשנה יסעו {ס}

¹⁰י דגל מחנה ראובן תימנה לצבאתם ונשיא לבני ראובן אליצור בן שדיאור

¹¹יא וצבאו ופקדיו--ששה וארבעים אלף וחמש מאות

¹²יב והחונם עליו מטה שמעון ונשיא לבני שמעון שלמיאל בן צורישדי

¹³יג וצבאו ופקדיהם--תשעה וחמשים אלף ושלש מאות

¹⁴יד ומטה גד ונשיא לבני גד אליסף בן רעואל

¹⁵טו וצבאו ופקדיהם--חמשה וארבעים אלף ושש מאות וחמשים

¹⁶טז כל הפקדים למחנה ראובן מאת אלף ואחד וחמשים אלף וארבע מאות וחמשים--לצבאתם ושנים יסעו {ס}

¹⁷יז ונסע אהל מועד מחנה הלוים בתוך המחנת כאשר יחנו כן יסעו איש על ידו לדגליהם {ס}

¹⁸יח דגל מחנה אפרים לצבאתם ימה ונשיא לבני אפרים אלישמע בן עמיהוד

¹⁹יט וצבאו ופקדיהם--ארבעים אלף וחמש מאות

²⁰כ ועליו מטה מנשה ונשיא לבני מנשה גמליאל בן פדהצור

²¹כא וצבאו ופקדיהם--שנים ושלשים אלף ומאתים

²²כב ומטה בנימן ונשיא לבני בנימן אבידן בן גדעני

²³כג וצבאו ופקדיהם--חמשה ושלשים אלף וארבע מאות

²⁴כד כל הפקדים למחנה אפרים מאת אלף ושמנת אלפים ומאה--לצבאתם ושלשים יסעו {ס}

²⁵כה דגל מחנה דן צפנה לצבאתם ונשיא לבני דן אחיעזר בן עמישדי

²⁶כו וצבאו ופקדיהם--שנים וששים אלף ושבע מאות

²⁷כז והחנים עליו מטה אשר ונשיא לבני אשר פגעיאל בן עכרן

²⁸כח וצבאו ופקדיהם--אחד וארבעים אלף וחמש מאות

²⁹כט ומטה נפתלי ונשיא לבני נפתלי אחירע בן עינן

³⁰ל וצבאו ופקדיהם--שלשה וחמשים אלף וארבע מאות

³¹לא כל הפקדים למחנה דן--מאת אלף ושבעה וחמשים אלף ושש מאות לאחרנה יסעו לדגליהם {פ}

³²לב אלה פקודי בני ישראל לבית אבתם כל פקודי המחנת לצבאתם--שש מאות אלף ושלשת אלפים וחמש מאות וחמשים

³³לג והלוים--לא התפקדו בתוך בני ישראל כאשר צוה יהוה את משה

³⁴לד ויעשו בני ישראל ככל אשר צוה יהוה את משה כן חנו לדגליהם וכן נסעו--איש למשפחתיו על בית אבתיו {פ}