Read כֶּתֶר אֲרָם צוֹבָא - Tanah Aleppo Codex במדבר 20 Bible Online

במדבר 20 - כֶּתֶר אֲרָם צוֹבָא - Tanah Aleppo Codex bible

במדבר 20

¹א ויבאו בני ישראל כל העדה מדבר צן בחדש הראשון וישב העם בקדש ותמת שם מרים ותקבר שם

²ב ולא היה מים לעדה ויקהלו על משה ועל אהרן

³ג וירב העם עם משה ויאמרו לאמר ולו גוענו בגוע אחינו לפני יהוה

⁴ד ולמה הבאתם את קהל יהוה אל המדבר הזה למות שם אנחנו ובעירנו

⁵ה ולמה העליתנו ממצרים להביא אתנו אל המקום הרע הזה לא מקום זרע ותאנה וגפן ורמון ומים אין לשתות

⁶ו ויבא משה ואהרן מפני הקהל אל פתח אהל מועד ויפלו על פניהם וירא כבוד יהוה אליהם {פ}

⁷ז וידבר יהוה אל משה לאמר

⁸ח קח את המטה והקהל את העדה אתה ואהרן אחיך ודברתם אל הסלע לעיניהם ונתן מימיו והוצאת להם מים מן הסלע והשקית את העדה ואת בעירם

⁹ט ויקח משה את המטה מלפני יהוה כאשר צוהו

¹⁰י ויקהלו משה ואהרן את הקהל--אל פני הסלע ויאמר להם שמעו נא המרים--המן הסלע הזה נוציא לכם מים

¹¹יא וירם משה את ידו ויך את הסלע במטהו--פעמים ויצאו מים רבים ותשת העדה ובעירם {ס}

¹²יב ויאמר יהוה אל משה ואל אהרן יען לא האמנתם בי להקדישני לעיני בני ישראל--לכן לא תביאו את הקהל הזה אל הארץ אשר נתתי להם

¹³יג המה מי מריבה אשר רבו בני ישראל את יהוה ויקדש בם {ס}

¹⁴יד וישלח משה מלאכים מקדש אל מלך אדום כה אמר אחיך ישראל אתה ידעת את כל התלאה אשר מצאתנו

¹⁵טו וירדו אבתינו מצרימה ונשב במצרים ימים רבים וירעו לנו מצרים ולאבתינו

¹⁶טז ונצעק אל יהוה וישמע קלנו וישלח מלאך ויצאנו ממצרים והנה אנחנו בקדש עיר קצה גבולך

¹⁷יז נעברה נא בארצך לא נעבר בשדה ובכרם ולא נשתה מי באר דרך המלך נלך לא נטה ימין ושמאול עד אשר נעבר גבלך

¹⁸יח ויאמר אליו אדום לא תעבר בי--פן בחרב אצא לקראתך

¹⁹יט ויאמרו אליו בני ישראל במסלה נעלה ואם מימיך נשתה אני ומקני ונתתי מכרם רק אין דבר ברגלי אעברה

²⁰כ ויאמר לא תעבר ויצא אדום לקראתו בעם כבד וביד חזקה

²¹כא וימאן אדום נתן את ישראל עבר בגבלו ויט ישראל מעליו {פ}

²²כב ויסעו מקדש ויבאו בני ישראל כל העדה הר ההר

²³כג ויאמר יהוה אל משה ואל אהרן בהר ההר על גבול ארץ אדום לאמר

²⁴כד יאסף אהרן אל עמיו כי לא יבא אל הארץ אשר נתתי לבני ישראל--על אשר מריתם את פי למי מריבה

²⁵כה קח את אהרן ואת אלעזר בנו והעל אתם הר ההר

²⁶כו והפשט את אהרן את בגדיו והלבשתם את אלעזר בנו ואהרן יאסף ומת שם

²⁷כז ויעש משה כאשר צוה יהוה ויעלו אל הר ההר לעיני כל העדה

²⁸כח ויפשט משה את אהרן את בגדיו וילבש אתם את אלעזר בנו וימת אהרן שם בראש ההר וירד משה ואלעזר מן ההר

²⁹כט ויראו כל העדה כי גוע אהרן ויבכו את אהרן שלשים יום כל בית ישראל {ס}