Read כֶּתֶר אֲרָם צוֹבָא - Tanah Aleppo Codex במדבר 21 Bible Online

במדבר 21 - כֶּתֶר אֲרָם צוֹבָא - Tanah Aleppo Codex bible

במדבר 21

¹א וישמע הכנעני מלך ערד ישב הנגב כי בא ישראל דרך האתרים וילחם בישראל וישב ממנו שבי

²ב וידר ישראל נדר ליהוה ויאמר אם נתן תתן את העם הזה בידי--והחרמתי את עריהם

³ג וישמע יהוה בקול ישראל ויתן את הכנעני ויחרם אתהם ואת עריהם ויקרא שם המקום חרמה {פ}

⁴ד ויסעו מהר ההר דרך ים סוף לסבב את ארץ אדום ותקצר נפש העם בדרך

⁵ה וידבר העם באלהים ובמשה למה העליתנו ממצרים למות במדבר כי אין לחם ואין מים ונפשנו קצה בלחם הקלקל

⁶ו וישלח יהוה בעם את הנחשים השרפים וינשכו את העם וימת עם רב מישראל

⁷ז ויבא העם אל משה ויאמרו חטאנו כי דברנו ביהוה ובך--התפלל אל יהוה ויסר מעלינו את הנחש ויתפלל משה בעד העם

⁸ח ויאמר יהוה אל משה עשה לך שרף ושים אתו על נס והיה כל הנשוך וראה אתו וחי

⁹ט ויעש משה נחש נחשת וישמהו על הנס והיה אם נשך הנחש את איש--והביט אל נחש הנחשת וחי

¹⁰י ויסעו בני ישראל ויחנו באבת

¹¹יא ויסעו מאבת ויחנו בעיי העברים במדבר אשר על פני מואב ממזרח השמש

¹²יב משם נסעו ויחנו בנחל זרד

¹³יג משם נסעו ויחנו מעבר ארנון אשר במדבר היצא מגבל האמרי כי ארנון גבול מואב בין מואב ובין האמרי

¹⁴יד על כן יאמר בספר מלחמת יהוה את והב בסופה ואת הנחלים ארנון

¹⁵טו ואשד הנחלים אשר נטה לשבת ער ונשען לגבול מואב

¹⁶טז ומשם בארה הוא הבאר אשר אמר יהוה למשה אסף את העם ואתנה להם מים {ס}

¹⁷יז אז ישיר ישראל את השירה הזאת עלי באר ענו לה

¹⁸יח באר חפרוה שרים כרוה נדיבי העם במחקק במשענתם וממדבר מתנה

¹⁹יט וממתנה נחליאל ומנחליאל במות

²⁰כ ומבמות הגיא אשר בשדה מואב--ראש הפסגה ונשקפה על פני הישימן {פ}

²¹כא וישלח ישראל מלאכים אל סיחן מלך האמרי לאמר

²²כב אעברה בארצך לא נטה בשדה ובכרם--לא נשתה מי באר בדרך המלך נלך עד אשר נעבר גבלך

²³כג ולא נתן סיחן את ישראל עבר בגבלו ויאסף סיחן את כל עמו ויצא לקראת ישראל המדברה ויבא יהצה וילחם בישראל

²⁴כד ויכהו ישראל לפי חרב ויירש את ארצו מארנן עד יבק עד בני עמון--כי עז גבול בני עמון

²⁵כה ויקח ישראל את כל הערים האלה וישב ישראל בכל ערי האמרי בחשבון ובכל בנתיה

²⁶כו כי חשבון--עיר סיחן מלך האמרי הוא והוא נלחם במלך מואב הראשון ויקח את כל ארצו מידו עד ארנן

²⁷כז על כן יאמרו המשלים באו חשבון תבנה ותכונן עיר סיחון

²⁸כח כי אש יצאה מחשבון להבה מקרית סיחן אכלה ער מואב בעלי במות ארנן

²⁹כט אוי לך מואב אבדת עם כמוש נתן בניו פליטם ובנתיו בשבית למלך אמרי סיחון

³⁰ל ונירם אבד חשבון עד דיבן ונשים עד נפח אשר עד מידבא

³¹לא וישב ישראל בארץ האמרי

³²לב וישלח משה לרגל את יעזר וילכדו בנתיה ויירש (ויורש) את האמרי אשר שם

³³לג ויפנו ויעלו דרך הבשן ויצא עוג מלך הבשן לקראתם הוא וכל עמו למלחמה--אדרעי

³⁴לד ויאמר יהוה אל משה אל תירא אתו--כי בידך נתתי אתו ואת כל עמו ואת ארצו ועשית לו--כאשר עשית לסיחן מלך האמרי אשר יושב בחשבון

³⁵לה ויכו אתו ואת בניו ואת כל עמו עד בלתי השאיר לו שריד ויירשו את ארצו