Read כֶּתֶר אֲרָם צוֹבָא - Tanah Aleppo Codex במדבר 23 Bible Online

במדבר 23 - כֶּתֶר אֲרָם צוֹבָא - Tanah Aleppo Codex bible

במדבר 23

¹א ויאמר בלעם אל בלק בנה לי בזה שבעה מזבחת והכן לי בזה שבעה פרים ושבעה אילים

²ב ויעש בלק כאשר דבר בלעם ויעל בלק ובלעם פר ואיל במזבח

³ג ויאמר בלעם לבלק התיצב על עלתך ואלכה אולי יקרה יהוה לקראתי ודבר מה יראני והגדתי לך וילך שפי

⁴ד ויקר אלהים אל בלעם ויאמר אליו את שבעת המזבחת ערכתי ואעל פר ואיל במזבח

⁵ה וישם יהוה דבר בפי בלעם ויאמר שוב אל בלק וכה תדבר

⁶ו וישב אליו והנה נצב על עלתו--הוא וכל שרי מואב

⁷ז וישא משלו ויאמר מן ארם ינחני בלק מלך מואב מהררי קדם--לכה ארה לי יעקב ולכה זעמה ישראל

⁸ח מה אקב לא קבה אל ומה אזעם לא זעם יהוה

⁹ט כי מראש צרים אראנו ומגבעות אשורנו הן עם לבדד ישכן ובגוים לא יתחשב

¹⁰י מי מנה עפר יעקב ומספר את רבע ישראל תמת נפשי מות ישרים ותהי אחריתי כמהו

¹¹יא ויאמר בלק אל בלעם מה עשית לי לקב איבי לקחתיך והנה ברכת ברך

¹²יב ויען ויאמר הלא את אשר ישים יהוה בפי--אתו אשמר לדבר

¹³יג ויאמר אליו בלק לך נא אתי אל מקום אחר אשר תראנו משם--אפס קצהו תראה וכלו לא תראה וקבנו לי משם

¹⁴יד ויקחהו שדה צפים אל ראש הפסגה ויבן שבעה מזבחת ויעל פר ואיל במזבח

¹⁵טו ויאמר אל בלק התיצב כה על עלתך ואנכי אקרה כה

¹⁶טז ויקר יהוה אל בלעם וישם דבר בפיו ויאמר שוב אל בלק וכה תדבר

¹⁷יז ויבא אליו והנו נצב על עלתו ושרי מואב אתו ויאמר לו בלק מה דבר יהוה

¹⁸יח וישא משלו ויאמר קום בלק ושמע האזינה עדי בנו צפר

¹⁹יט לא איש אל ויכזב ובן אדם ויתנחם ההוא אמר ולא יעשה ודבר ולא יקימנה

²⁰כ הנה ברך לקחתי וברך ולא אשיבנה

²¹כא לא הביט און ביעקב ולא ראה עמל בישראל יהוה אלהיו עמו ותרועת מלך בו

²²כב אל מוציאם ממצרים--כתועפת ראם לו

²³כג כי לא נחש ביעקב ולא קסם בישראל כעת יאמר ליעקב ולישראל מה פעל אל

²⁴כד הן עם כלביא יקום וכארי יתנשא לא ישכב עד יאכל טרף ודם חללים ישתה

²⁵כה ויאמר בלק אל בלעם גם קב לא תקבנו גם ברך לא תברכנו

²⁶כו ויען בלעם ויאמר אל בלק הלא דברתי אליך לאמר כל אשר ידבר יהוה אתו אעשה

²⁷כז ויאמר בלק אל בלעם לכה נא אקחך אל מקום אחר אולי יישר בעיני האלהים וקבתו לי משם

²⁸כח ויקח בלק את בלעם ראש הפעור הנשקף על פני הישימן

²⁹כט ויאמר בלעם אל בלק בנה לי בזה שבעה מזבחת והכן לי בזה שבעה פרים ושבעה אילם

³⁰ל ויעש בלק כאשר אמר בלעם ויעל פר ואיל במזבח