Read כֶּתֶר אֲרָם צוֹבָא - Tanah Aleppo Codex במדבר 24 Bible Online

במדבר 24 - כֶּתֶר אֲרָם צוֹבָא - Tanah Aleppo Codex bible

במדבר 24

¹א וירא בלעם כי טוב בעיני יהוה לברך את ישראל ולא הלך כפעם בפעם לקראת נחשים וישת אל המדבר פניו

²ב וישא בלעם את עיניו וירא את ישראל שכן לשבטיו ותהי עליו רוח אלהים

³ג וישא משלו ויאמר נאם בלעם בנו בער ונאם הגבר שתם העין

⁴ד נאם--שמע אמרי אל אשר מחזה שדי יחזה נפל וגלוי עינים

⁵ה מה טבו אהליך יעקב משכנתיך ישראל

⁶ו כנחלים נטיו כגנת עלי נהר כאהלים נטע יהוה כארזים עלי מים

⁷ז יזל מים מדליו וזרעו במים רבים וירם מאגג מלכו ותנשא מלכתו

⁸ח אל מוציאו ממצרים כתועפת ראם לו יאכל גוים צריו ועצמתיהם יגרם--וחציו ימחץ

⁹ט כרע שכב כארי וכלביא מי יקימנו מברכיך ברוך וארריך ארור

¹⁰י ויחר אף בלק אל בלעם ויספק את כפיו ויאמר בלק אל בלעם לקב איבי קראתיך והנה ברכת ברך זה שלש פעמים

¹¹יא ועתה ברח לך אל מקומך אמרתי כבד אכבדך והנה מנעך יהוה מכבוד

¹²יב ויאמר בלעם אל בלק הלא גם אל מלאכיך אשר שלחת אלי--דברתי לאמר

¹³יג אם יתן לי בלק מלא ביתו כסף וזהב--לא אוכל לעבר את פי יהוה לעשות טובה או רעה מלבי אשר ידבר יהוה אתו אדבר

¹⁴יד ועתה הנני הולך לעמי לכה איעצך אשר יעשה העם הזה לעמך באחרית הימים

¹⁵טו וישא משלו ויאמר נאם בלעם בנו בער ונאם הגבר שתם העין

¹⁶טז נאם שמע אמרי אל וידע דעת עליון מחזה שדי יחזה נפל וגלוי עינים

¹⁷יז אראנו ולא עתה אשורנו ולא קרוב דרך כוכב מיעקב וקם שבט מישראל ומחץ פאתי מואב וקרקר כל בני שת

¹⁸יח והיה אדום ירשה והיה ירשה שעיר--איביו וישראל עשה חיל

¹⁹יט וירד מיעקב והאביד שריד מעיר

²⁰כ וירא את עמלק וישא משלו ויאמר ראשית גוים עמלק ואחריתו עדי אבד

²¹כא וירא את הקיני וישא משלו ויאמר איתן מושבך ושים בסלע קנך

²²כב כי אם יהיה לבער קין--עד מה אשור תשבך

²³כג וישא משלו ויאמר אוי מי יחיה משמו אל

²⁴כד וצים מיד כתים וענו אשור וענו עבר וגם הוא עדי אבד

²⁵כה ויקם בלעם וילך וישב למקמו וגם בלק הלך לדרכו {פ}