Read כֶּתֶר אֲרָם צוֹבָא - Tanah Aleppo Codex במדבר 25 Bible Online

במדבר 25 - כֶּתֶר אֲרָם צוֹבָא - Tanah Aleppo Codex bible

במדבר 25

¹א וישב ישראל בשטים ויחל העם לזנות אל בנות מואב

²ב ותקראן לעם לזבחי אלהיהן ויאכל העם וישתחוו לאלהיהן

³ג ויצמד ישראל לבעל פעור ויחר אף יהוה בישראל

⁴ד ויאמר יהוה אל משה קח את כל ראשי העם והוקע אותם ליהוה נגד השמש וישב חרון אף יהוה מישראל

⁵ה ויאמר משה אל שפטי ישראל הרגו איש אנשיו הנצמדים לבעל פעור

⁶ו והנה איש מבני ישראל בא ויקרב אל אחיו את המדינית לעיני משה ולעיני כל עדת בני ישראל והמה בכים פתח אהל מועד

⁷ז וירא פינחס בן אלעזר בן אהרן הכהן ויקם מתוך העדה ויקח רמח בידו

⁸ח ויבא אחר איש ישראל אל הקבה וידקר את שניהם--את איש ישראל ואת האשה אל קבתה ותעצר המגפה מעל בני ישראל

⁹ט ויהיו המתים במגפה--ארבעה ועשרים אלף {פ}

¹⁰י וידבר יהוה אל משה לאמר

¹¹יא פינחס בן אלעזר בן אהרן הכהן השיב את חמתי מעל בני ישראל בקנאו את קנאתי בתוכם ולא כליתי את בני ישראל בקנאתי

¹²יב לכן אמר הנני נתן לו את בריתי שלום

¹³יג והיתה לו ולזרעו אחריו ברית כהנת עולם--תחת אשר קנא לאלהיו ויכפר על בני ישראל

¹⁴יד ושם איש ישראל המכה אשר הכה את המדינית--זמרי בן סלוא נשיא בית אב לשמעני

¹⁵טו ושם האשה המכה המדינית כזבי בת צור ראש אמות בית אב במדין הוא {פ}

¹⁶טז וידבר יהוה אל משה לאמר

¹⁷יז צרור את המדינים והכיתם אותם

¹⁸יח כי צררים הם לכם בנכליהם אשר נכלו לכם על דבר פעור ועל דבר כזבי בת נשיא מדין אחתם המכה ביום המגפה על דבר פעור