Read כֶּתֶר אֲרָם צוֹבָא - Tanah Aleppo Codex במדבר 28 Bible Online

במדבר 28 - כֶּתֶר אֲרָם צוֹבָא - Tanah Aleppo Codex bible

במדבר 28

¹א וידבר יהוה אל משה לאמר

²ב צו את בני ישראל ואמרת אלהם את קרבני לחמי לאשי ריח ניחחי תשמרו להקריב לי במועדו

³ג ואמרת להם--זה האשה אשר תקריבו ליהוה כבשים בני שנה תמימם שנים ליום עלה תמיד

⁴ד את הכבש אחד תעשה בבקר ואת הכבש השני תעשה בין הערבים

⁵ה ועשירית האיפה סלת למנחה בלולה בשמן כתית רביעת ההין

⁶ו עלת תמיד--העשיה בהר סיני לריח ניחח אשה ליהוה

⁷ז ונסכו רביעת ההין לכבש האחד בקדש הסך נסך שכר--ליהוה

⁸ח ואת הכבש השני תעשה בין הערבים כמנחת הבקר וכנסכו תעשה אשה ריח ניחח ליהוה {פ}

⁹ט וביום השבת--שני כבשים בני שנה תמימם ושני עשרנים סלת מנחה בלולה בשמן--ונסכו

¹⁰י עלת שבת בשבתו על עלת התמיד ונסכה {פ}

¹¹יא ובראשי חדשיכם--תקריבו עלה ליהוה פרים בני בקר שנים ואיל אחד כבשים בני שנה שבעה תמימם

¹²יב ושלשה עשרנים סלת מנחה בלולה בשמן לפר האחד ושני עשרנים סלת מנחה בלולה בשמן לאיל האחד

¹³יג ועשרן עשרון סלת מנחה בלולה בשמן לכבש האחד עלה ריח ניחח אשה ליהוה

¹⁴יד ונסכיהם חצי ההין יהיה לפר ושלישת ההין לאיל ורביעת ההין לכבש--יין זאת עלת חדש בחדשו לחדשי השנה

¹⁵טו ושעיר עזים אחד לחטאת ליהוה על עלת התמיד יעשה ונסכו {ס}

¹⁶טז ובחדש הראשון בארבעה עשר יום--לחדש פסח ליהוה

¹⁷יז ובחמשה עשר יום לחדש הזה חג שבעת ימים מצות יאכל

¹⁸יח ביום הראשון מקרא קדש כל מלאכת עבדה לא תעשו

¹⁹יט והקרבתם אשה עלה ליהוה פרים בני בקר שנים ואיל אחד ושבעה כבשים בני שנה תמימם יהיו לכם

²⁰כ ומנחתם--סלת בלולה בשמן שלשה עשרנים לפר ושני עשרנים לאיל--תעשו

²¹כא עשרון עשרון תעשה לכבש האחד--לשבעת הכבשים

²²כב ושעיר חטאת אחד לכפר עליכם

²³כג מלבד עלת הבקר אשר לעלת התמיד--תעשו את אלה

²⁴כד כאלה תעשו ליום שבעת ימים--לחם אשה ריח ניחח ליהוה על עולת התמיד יעשה ונסכו

²⁵כה וביום השביעי--מקרא קדש יהיה לכם כל מלאכת עבדה לא תעשו {ס}

²⁶כו וביום הבכורים בהקריבכם מנחה חדשה ליהוה--בשבעתיכם מקרא קדש יהיה לכם כל מלאכת עבדה לא תעשו

²⁷כז והקרבתם עולה לריח ניחח ליהוה--פרים בני בקר שנים איל אחד שבעה כבשים בני שנה

²⁸כח ומנחתם--סלת בלולה בשמן שלשה עשרנים לפר האחד שני עשרנים לאיל האחד

²⁹כט עשרון עשרון לכבש האחד--לשבעת הכבשים

³⁰ל שעיר עזים אחד לכפר עליכם

³¹לא מלבד עלת התמיד ומנחתו--תעשו תמימם יהיו לכם ונסכיהם {פ}