Read כֶּתֶר אֲרָם צוֹבָא - Tanah Aleppo Codex במדבר 3 Bible Online

במדבר 3 - כֶּתֶר אֲרָם צוֹבָא - Tanah Aleppo Codex bible

במדבר 3

¹א ואלה תולדת אהרן ומשה ביום דבר יהוה את משה--בהר סיני

²ב ואלה שמות בני אהרן הבכר נדב ואביהוא אלעזר ואיתמר

³ג אלה שמות בני אהרן הכהנים המשחים--אשר מלא ידם לכהן

⁴ד וימת נדב ואביהוא לפני יהוה בהקרבם אש זרה לפני יהוה במדבר סיני ובנים לא היו להם ויכהן אלעזר ואיתמר על פני אהרן אביהם {פ}

⁵ה וידבר יהוה אל משה לאמר

⁶ו הקרב את מטה לוי והעמדת אתו לפני אהרן הכהן ושרתו אתו

⁷ז ושמרו את משמרתו ואת משמרת כל העדה לפני אהל מועד--לעבד את עבדת המשכן

⁸ח ושמרו את כל כלי אהל מועד ואת משמרת בני ישראל--לעבד את עבדת המשכן

⁹ט ונתתה את הלוים לאהרן ולבניו נתונם נתונם המה לו מאת בני ישראל

¹⁰י ואת אהרן ואת בניו תפקד ושמרו את כהנתם והזר הקרב יומת {פ}

¹¹יא וידבר יהוה אל משה לאמר

¹²יב ואני הנה לקחתי את הלוים מתוך בני ישראל תחת כל בכור פטר רחם מבני ישראל והיו לי הלוים

¹³יג כי לי כל בכור--ביום הכתי כל בכור בארץ מצרים הקדשתי לי כל בכור בישראל מאדם עד בהמה לי יהיו אני יהוה {פ}

¹⁴יד וידבר יהוה אל משה במדבר סיני לאמר

¹⁵טו פקד את בני לוי לבית אבתם למשפחתם כל זכר מבן חדש ומעלה תפקדם

¹⁶טז ויפקד אתם משה על פי יהוה כאשר צוה

¹⁷יז ויהיו אלה בני לוי בשמתם--גרשון וקהת ומררי

¹⁸יח ואלה שמות בני גרשון למשפחתם--לבני ושמעי

¹⁹יט ובני קהת למשפחתם--עמרם ויצהר חברון ועזיאל

²⁰כ ובני מררי למשפחתם--מחלי ומושי אלה הם משפחת הלוי לבית אבתם

²¹כא לגרשון--משפחת הלבני ומשפחת השמעי אלה הם משפחת הגרשני

²²כב פקדיהם במספר כל זכר מבן חדש ומעלה פקדיהם שבעת אלפים וחמש מאות

²³כג משפחת הגרשני אחרי המשכן יחנו ימה

²⁴כד ונשיא בית אב לגרשני אליסף בן לאל

²⁵כה ומשמרת בני גרשון באהל מועד המשכן והאהל מכסהו--ומסך פתח אהל מועד

²⁶כו וקלעי החצר ואת מסך פתח החצר אשר על המשכן ועל המזבח סביב ואת מיתריו לכל עבדתו {ס}

²⁷כז ולקהת משפחת העמרמי ומשפחת היצהרי ומשפחת החברני ומשפחת העזיאלי אלה הם משפחת הקהתי

²⁸כח במספר כל זכר מבן חדש ומעלה--שמנת אלפים ושש מאות שמרי משמרת הקדש

²⁹כט משפחת בני קהת יחנו על ירך המשכן תימנה

³⁰ל ונשיא בית אב למשפחת הקהתי אליצפן בן עזיאל

³¹לא ומשמרתם הארן והשלחן והמנרה והמזבחת וכלי הקדש אשר ישרתו בהם והמסך--וכל עבדתו

³²לב ונשיא נשיאי הלוי אלעזר בן אהרן הכהן פקדת שמרי משמרת הקדש

³³לג למררי--משפחת המחלי ומשפחת המושי אלה הם משפחת מררי

³⁴לד ופקדיהם במספר כל זכר מבן חדש ומעלה--ששת אלפים ומאתים

³⁵לה ונשיא בית אב למשפחת מררי צוריאל בן אביחיל על ירך המשכן יחנו צפנה

³⁶לו ופקדת משמרת בני מררי--קרשי המשכן ובריחיו ועמדיו ואדניו וכל כליו--וכל עבדתו

³⁷לז ועמדי החצר סביב ואדניהם ויתדתם ומיתריהם

³⁸לח והחנים לפני המשכן קדמה לפני אהל מועד מזרחה משה ואהרן ובניו שמרים משמרת המקדש למשמרת בני ישראל והזר הקרב יומת

³⁹לט כל פקודי הלוים אשר פקד משה ואהרן על פי יהוה--למשפחתם כל זכר מבן חדש ומעלה שנים ועשרים אלף {ס}

⁴⁰מ ויאמר יהוה אל משה פקד כל בכר זכר לבני ישראל מבן חדש ומעלה ושא את מספר שמתם

⁴¹מא ולקחת את הלוים לי אני יהוה תחת כל בכר בבני ישראל ואת בהמת הלוים תחת כל בכור בבהמת בני ישראל

⁴²מב ויפקד משה כאשר צוה יהוה אתו את כל בכור בבני ישראל

⁴³מג ויהי כל בכור זכר במספר שמת מבן חדש ומעלה--לפקדיהם שנים ועשרים אלף שלשה ושבעים ומאתים {פ}

⁴⁴מד וידבר יהוה אל משה לאמר

⁴⁵מה קח את הלוים תחת כל בכור בבני ישראל ואת בהמת הלוים תחת בהמתם והיו לי הלוים אני יהוה

⁴⁶מו ואת פדויי השלשה והשבעים והמאתים--העדפים על הלוים מבכור בני ישראל

⁴⁷מז ולקחת חמשת חמשת שקלים--לגלגלת בשקל הקדש תקח עשרים גרה השקל

⁴⁸מח ונתתה הכסף לאהרן ולבניו--פדויי העדפים בהם

⁴⁹מט ויקח משה את כסף הפדיום--מאת העדפים על פדויי הלוים

⁵⁰נ מאת בכור בני ישראל--לקח את הכסף חמשה וששים ושלש מאות ואלף--בשקל הקדש

⁵¹נא ויתן משה את כסף הפדים לאהרן ולבניו--על פי יהוה כאשר צוה יהוה את משה {פ}