Read כֶּתֶר אֲרָם צוֹבָא - Tanah Aleppo Codex במדבר 30 Bible Online

במדבר 30 - כֶּתֶר אֲרָם צוֹבָא - Tanah Aleppo Codex bible

במדבר 30

¹א ויאמר משה אל בני ישראל ככל אשר צוה יהוה את משה {פ}

²ב וידבר משה אל ראשי המטות לבני ישראל לאמר זה הדבר אשר צוה יהוה

³ג איש כי ידר נדר ליהוה או השבע שבעה לאסר אסר על נפשו--לא יחל דברו ככל היצא מפיו יעשה

⁴ד ואשה כי תדר נדר ליהוה ואסרה אסר בבית אביה בנעריה

⁵ה ושמע אביה את נדרה ואסרה אשר אסרה על נפשה והחריש לה אביה--וקמו כל נדריה וכל אסר אשר אסרה על נפשה יקום

⁶ו ואם הניא אביה אתה ביום שמעו--כל נדריה ואסריה אשר אסרה על נפשה לא יקום ויהוה יסלח לה כי הניא אביה אתה

⁷ז ואם היו תהיה לאיש ונדריה עליה או מבטא שפתיה אשר אסרה על נפשה

⁸ח ושמע אישה ביום שמעו והחריש לה וקמו נדריה ואסרה אשר אסרה על נפשה--יקמו

⁹ט ואם ביום שמע אישה יניא אותה והפר את נדרה אשר עליה ואת מבטא שפתיה אשר אסרה על נפשה--ויהוה יסלח לה

¹⁰י ונדר אלמנה וגרושה--כל אשר אסרה על נפשה יקום עליה

¹¹יא ואם בית אישה נדרה או אסרה אסר על נפשה בשבעה

¹²יב ושמע אישה והחרש לה לא הניא אתה--וקמו כל נדריה וכל אסר אשר אסרה על נפשה יקום

¹³יג ואם הפר יפר אתם אישה ביום שמעו--כל מוצא שפתיה לנדריה ולאסר נפשה לא יקום אישה הפרם ויהוה יסלח לה

¹⁴יד כל נדר וכל שבעת אסר לענת נפש--אישה יקימנו ואישה יפרנו

¹⁵טו ואם החרש יחריש לה אישה מיום אל יום והקים את כל נדריה או את כל אסריה אשר עליה--הקים אתם כי החרש לה ביום שמעו

¹⁶טז ואם הפר יפר אתם אחרי שמעו--ונשא את עונה [ (Numbers 30:17) יז אלה החקים אשר צוה יהוה את משה בין איש לאשתו--בין אב לבתו בנעריה בית אביה {פ} ]