Read כֶּתֶר אֲרָם צוֹבָא - Tanah Aleppo Codex במדבר 31 Bible Online

במדבר 31 - כֶּתֶר אֲרָם צוֹבָא - Tanah Aleppo Codex bible

במדבר 31

¹א וידבר יהוה אל משה לאמר

²ב נקם נקמת בני ישראל מאת המדינים אחר תאסף אל עמיך

³ג וידבר משה אל העם לאמר החלצו מאתכם אנשים לצבא ויהיו על מדין לתת נקמת יהוה במדין

⁴ד אלף למטה אלף למטה--לכל מטות ישראל תשלחו לצבא

⁵ה וימסרו מאלפי ישראל אלף למטה--שנים עשר אלף חלוצי צבא

⁶ו וישלח אתם משה אלף למטה לצבא אתם ואת פינחס בן אלעזר הכהן לצבא וכלי הקדש וחצצרות התרועה בידו

⁷ז ויצבאו על מדין כאשר צוה יהוה את משה ויהרגו כל זכר

⁸ח ואת מלכי מדין הרגו על חלליהם את אוי ואת רקם ואת צור ואת חור ואת רבע--חמשת מלכי מדין ואת בלעם בן בעור הרגו בחרב

⁹ט וישבו בני ישראל את נשי מדין ואת טפם ואת כל בהמתם ואת כל מקנהם ואת כל חילם בזזו

¹⁰י ואת כל עריהם במושבתם ואת כל טירתם--שרפו באש

¹¹יא ויקחו את כל השלל ואת כל המלקוח--באדם ובבהמה

¹²יב ויבאו אל משה ואל אלעזר הכהן ואל עדת בני ישראל את השבי ואת המלקוח ואת השלל--אל המחנה אל ערבת מואב אשר על ירדן ירחו {ס}

¹³יג ויצאו משה ואלעזר הכהן וכל נשיאי העדה--לקראתם אל מחוץ למחנה

¹⁴יד ויקצף משה על פקודי החיל שרי האלפים ושרי המאות הבאים מצבא המלחמה

¹⁵טו ויאמר אליהם משה החייתם כל נקבה

¹⁶טז הן הנה היו לבני ישראל בדבר בלעם למסר מעל ביהוה על דבר פעור ותהי המגפה בעדת יהוה

¹⁷יז ועתה הרגו כל זכר בטף וכל אשה ידעת איש למשכב זכר--הרגו

¹⁸יח וכל הטף בנשים אשר לא ידעו משכב זכר--החיו לכם

¹⁹יט ואתם חנו מחוץ למחנה--שבעת ימים כל הרג נפש וכל נגע בחלל תתחטאו ביום השלישי וביום השביעי--אתם ושביכם

²⁰כ וכל בגד וכל כלי עור וכל מעשה עזים וכל כלי עץ--תתחטאו {ס}

²¹כא ויאמר אלעזר הכהן אל אנשי הצבא הבאים למלחמה זאת חקת התורה אשר צוה יהוה את משה

²²כב אך את הזהב ואת הכסף את הנחשת את הברזל את הבדיל ואת העפרת

²³כג כל דבר אשר יבא באש תעבירו באש וטהר--אך במי נדה יתחטא וכל אשר לא יבא באש תעבירו במים

²⁴כד וכבסתם בגדיכם ביום השביעי וטהרתם ואחר תבאו אל המחנה {ס}

²⁵כה ויאמר יהוה אל משה לאמר

²⁶כו שא את ראש מלקוח השבי באדם ובבהמה--אתה ואלעזר הכהן וראשי אבות העדה

²⁷כז וחצית את המלקוח בין תפשי המלחמה היצאים לצבא--ובין כל העדה

²⁸כח והרמת מכס ליהוה מאת אנשי המלחמה היצאים לצבא--אחד נפש מחמש המאות מן האדם ומן הבקר ומן החמרים ומן הצאן

²⁹כט ממחציתם תקחו ונתתה לאלעזר הכהן תרומת יהוה

³⁰ל וממחצת בני ישראל תקח אחד אחז מן החמשים מן האדם מן הבקר מן החמרים ומן הצאן--מכל הבהמה ונתתה אתם ללוים שמרי משמרת משכן יהוה

³¹לא ויעש משה ואלעזר הכהן כאשר צוה יהוה את משה

³²לב ויהי המלקוח--יתר הבז אשר בזזו עם הצבא צאן שש מאות אלף ושבעים אלף--וחמשת אלפים

³³לג ובקר שנים ושבעים אלף

³⁴לד וחמרים אחד וששים אלף

³⁵לה ונפש אדם--מן הנשים אשר לא ידעו משכב זכר כל נפש שנים ושלשים אלף

³⁶לו ותהי המחצה--חלק היצאים בצבא מספר הצאן שלש מאות אלף ושלשים אלף ושבעת אלפים וחמש מאות

³⁷לז ויהי המכס ליהוה מן הצאן--שש מאות חמש ושבעים

³⁸לח והבקר--ששה ושלשים אלף ומכסם ליהוה שנים ושבעים

³⁹לט וחמרים שלשים אלף וחמש מאות ומכסם ליהוה אחד וששים

⁴⁰מ ונפש אדם ששה עשר אלף ומכסם ליהוה--שנים ושלשים נפש

⁴¹מא ויתן משה את מכס תרומת יהוה לאלעזר הכהן--כאשר צוה יהוה את משה

⁴²מב וממחצית בני ישראל אשר חצה משה מן האנשים הצבאים

⁴³מג ותהי מחצת העדה מן הצאן--שלש מאות אלף ושלשים אלף שבעת אלפים וחמש מאות

⁴⁴מד ובקר ששה ושלשים אלף

⁴⁵מה וחמרים שלשים אלף וחמש מאות

⁴⁶מו ונפש אדם ששה עשר אלף

⁴⁷מז ויקח משה ממחצת בני ישראל את האחז אחד מן החמשים--מן האדם ומן הבהמה ויתן אתם ללוים שמרי משמרת משכן יהוה כאשר צוה יהוה את משה

⁴⁸מח ויקרבו אל משה הפקדים אשר לאלפי הצבא--שרי האלפים ושרי המאות

⁴⁹מט ויאמרו אל משה עבדיך נשאו את ראש אנשי המלחמה אשר בידנו ולא נפקד ממנו איש

⁵⁰נ ונקרב את קרבן יהוה איש אשר מצא כלי זהב אצעדה וצמיד טבעת עגיל וכומז--לכפר על נפשתינו לפני יהוה

⁵¹נא ויקח משה ואלעזר הכהן את הזהב--מאתם כל כלי מעשה

⁵²נב ויהי כל זהב התרומה אשר הרימו ליהוה--ששה עשר אלף שבע מאות וחמשים שקל מאת שרי האלפים ומאת שרי המאות

⁵³נג אנשי הצבא בזזו איש לו

⁵⁴נד ויקח משה ואלעזר הכהן את הזהב מאת שרי האלפים והמאות ויבאו אתו אל אהל מועד זכרון לבני ישראל לפני יהוה {פ}