Read כֶּתֶר אֲרָם צוֹבָא - Tanah Aleppo Codex במדבר 33 Bible Online

במדבר 33 - כֶּתֶר אֲרָם צוֹבָא - Tanah Aleppo Codex bible

במדבר 33

¹א אלה מסעי בני ישראל אשר יצאו מארץ מצרים--לצבאתם ביד משה ואהרן

²ב ויכתב משה את מוצאיהם למסעיהם--על פי יהוה ואלה מסעיהם למוצאיהם

³ג ויסעו מרעמסס בחדש הראשון בחמשה עשר יום לחדש הראשון ממחרת הפסח יצאו בני ישראל ביד רמה--לעיני כל מצרים

⁴ד ומצרים מקברים את אשר הכה יהוה בהם--כל בכור ובאלהיהם עשה יהוה שפטים

⁵ה ויסעו בני ישראל מרעמסס ויחנו בסכת

⁶ו ויסעו מסכת ויחנו באתם אשר בקצה המדבר

⁷ז ויסעו מאתם וישב על פי החירת אשר על פני בעל צפון ויחנו לפני מגדל

⁸ח ויסעו מפני החירת ויעברו בתוך הים המדברה וילכו דרך שלשת ימים במדבר אתם ויחנו במרה

⁹ט ויסעו ממרה ויבאו אילמה ובאילם שתים עשרה עינת מים ושבעים תמרים--ויחנו שם

¹⁰י ויסעו מאילם ויחנו על ים סוף

¹¹יא ויסעו מים סוף ויחנו במדבר סין

¹²יב ויסעו ממדבר סין ויחנו בדפקה

¹³יג ויסעו מדפקה ויחנו באלוש

¹⁴יד ויסעו מאלוש ויחנו ברפידם ולא היה שם מים לעם לשתות

¹⁵טו ויסעו מרפידם ויחנו במדבר סיני

¹⁶טז ויסעו ממדבר סיני ויחנו בקברת התאוה

¹⁷יז ויסעו מקברת התאוה ויחנו בחצרת

¹⁸יח ויסעו מחצרת ויחנו ברתמה

¹⁹יט ויסעו מרתמה ויחנו ברמן פרץ

²⁰כ ויסעו מרמן פרץ ויחנו בלבנה

²¹כא ויסעו מלבנה ויחנו ברסה

²²כב ויסעו מרסה ויחנו בקהלתה

²³כג ויסעו מקהלתה ויחנו בהר שפר

²⁴כד ויסעו מהר שפר ויחנו בחרדה

²⁵כה ויסעו מחרדה ויחנו במקהלת

²⁶כו ויסעו ממקהלת ויחנו בתחת

²⁷כז ויסעו מתחת ויחנו בתרח

²⁸כח ויסעו מתרח ויחנו במתקה

²⁹כט ויסעו ממתקה ויחנו בחשמנה

³⁰ל ויסעו מחשמנה ויחנו במסרות

³¹לא ויסעו ממסרות ויחנו בבני יעקן

³²לב ויסעו מבני יעקן ויחנו בחר הגדגד

³³לג ויסעו מחר הגדגד ויחנו ביטבתה

³⁴לד ויסעו מיטבתה ויחנו בעברנה

³⁵לה ויסעו מעברנה ויחנו בעצין גבר

³⁶לו ויסעו מעצין גבר ויחנו במדבר צן הוא קדש

³⁷לז ויסעו מקדש ויחנו בהר ההר בקצה ארץ אדום

³⁸לח ויעל אהרן הכהן אל הר ההר על פי יהוה--וימת שם בשנת הארבעים לצאת בני ישראל מארץ מצרים בחדש החמישי באחד לחדש

³⁹לט ואהרן בן שלש ועשרים ומאת שנה במתו בהר ההר {ס}

⁴⁰מ וישמע הכנעני מלך ערד והוא ישב בנגב בארץ כנען--בבא בני ישראל

⁴¹מא ויסעו מהר ההר ויחנו בצלמנה

⁴²מב ויסעו מצלמנה ויחנו בפונן

⁴³מג ויסעו מפונן ויחנו באבת

⁴⁴מד ויסעו מאבת ויחנו בעיי העברים בגבול מואב

⁴⁵מה ויסעו מעיים ויחנו בדיבן גד

⁴⁶מו ויסעו מדיבן גד ויחנו בעלמן דבלתימה

⁴⁷מז ויסעו מעלמן דבלתימה ויחנו בהרי העברים לפני נבו

⁴⁸מח ויסעו מהרי העברים ויחנו בערבת מואב על ירדן ירחו

⁴⁹מט ויחנו על הירדן מבית הישמת עד אבל השטים בערבת מואב {ס}

⁵⁰נ וידבר יהוה אל משה בערבת מואב על ירדן ירחו לאמר

⁵¹נא דבר אל בני ישראל ואמרת אלהם כי אתם עברים את הירדן אל ארץ כנען

⁵²נב והורשתם את כל ישבי הארץ מפניכם ואבדתם את כל משכיתם ואת כל צלמי מסכתם תאבדו ואת כל במותם תשמידו

⁵³נג והורשתם את הארץ וישבתם בה כי לכם נתתי את הארץ לרשת אתה

⁵⁴נד והתנחלתם את הארץ בגורל למשפחתיכם לרב תרבו את נחלתו ולמעט תמעיט את נחלתו--אל אשר יצא לו שמה הגורל לו יהיה למטות אבתיכם תתנחלו

⁵⁵נה ואם לא תורישו את ישבי הארץ מפניכם--והיה אשר תותירו מהם לשכים בעיניכם ולצנינם בצדיכם וצררו אתכם--על הארץ אשר אתם ישבים בה

⁵⁶נו והיה כאשר דמיתי לעשות להם--אעשה לכם {פ}