Read כֶּתֶר אֲרָם צוֹבָא - Tanah Aleppo Codex במדבר 34 Bible Online

במדבר 34 - כֶּתֶר אֲרָם צוֹבָא - Tanah Aleppo Codex bible

במדבר 34

¹א וידבר יהוה אל משה לאמר

²ב צו את בני ישראל ואמרת אלהם כי אתם באים אל הארץ כנען זאת הארץ אשר תפל לכם בנחלה ארץ כנען לגבלתיה

³ג והיה לכם פאת נגב ממדבר צן על ידי אדום והיה לכם גבול נגב מקצה ים המלח קדמה

⁴ד ונסב לכם הגבול מנגב למעלה עקרבים ועבר צנה והיה (והיו) תוצאתיו מנגב לקדש ברנע ויצא חצר אדר ועבר עצמנה

⁵ה ונסב הגבול מעצמון נחלה מצרים והיו תוצאתיו הימה

⁶ו וגבול ים והיה לכם הים הגדול וגבול זה יהיה לכם גבול ים

⁷ז וזה יהיה לכם גבול צפון מן הים הגדל תתאו לכם הר ההר

⁸ח מהר ההר תתאו לבא חמת והיו תוצאת הגבל צדדה

⁹ט ויצא הגבל זפרנה והיו תוצאתיו חצר עינן זה יהיה לכם גבול צפון

¹⁰י והתאויתם לכם לגבול קדמה מחצר עינן שפמה

¹¹יא וירד הגבל משפם הרבלה מקדם לעין וירד הגבל ומחה על כתף ים כנרת קדמה

¹²יב וירד הגבול הירדנה והיו תוצאתיו ים המלח זאת תהיה לכם הארץ לגבלתיה סביב

¹³יג ויצו משה את בני ישראל לאמר זאת הארץ אשר תתנחלו אתה בגורל אשר צוה יהוה לתת לתשעת המטות וחצי המטה

¹⁴יד כי לקחו מטה בני הראובני לבית אבתם ומטה בני הגדי לבית אבתם וחצי מטה מנשה לקחו נחלתם

¹⁵טו שני המטות וחצי המטה לקחו נחלתם מעבר לירדן ירחו--קדמה מזרחה {פ}

¹⁶טז וידבר יהוה אל משה לאמר

¹⁷יז אלה שמות האנשים אשר ינחלו לכם את הארץ אלעזר הכהן ויהושע בן נון

¹⁸יח ונשיא אחד נשיא אחד ממטה--תקחו לנחל את הארץ

¹⁹יט ואלה שמות האנשים למטה יהודה כלב בן יפנה

²⁰כ ולמטה בני שמעון שמואל בן עמיהוד

²¹כא למטה בנימן אלידד בן כסלון

²²כב ולמטה בני דן נשיא--בקי בן יגלי

²³כג לבני יוסף למטה בני מנשה נשיא--חניאל בן אפד

²⁴כד ולמטה בני אפרים נשיא--קמואל בן שפטן

²⁵כה ולמטה בני זבולן נשיא--אליצפן בן פרנך

²⁶כו ולמטה בני יששכר נשיא--פלטיאל בן עזן

²⁷כז ולמטה בני אשר נשיא--אחיהוד בן שלמי

²⁸כח ולמטה בני נפתלי נשיא--פדהאל בן עמיהוד

²⁹כט אלה אשר צוה יהוה לנחל את בני ישראל בארץ כנען {פ}