Read כֶּתֶר אֲרָם צוֹבָא - Tanah Aleppo Codex במדבר 35 Bible Online

במדבר 35 - כֶּתֶר אֲרָם צוֹבָא - Tanah Aleppo Codex bible

במדבר 35

¹א וידבר יהוה אל משה בערבת מואב על ירדן ירחו לאמר

²ב צו את בני ישראל ונתנו ללוים מנחלת אחזתם ערים לשבת ומגרש לערים סביבתיהם תתנו ללוים

³ג והיו הערים להם לשבת ומגרשיהם יהיו לבהמתם ולרכשם ולכל חיתם

⁴ד ומגרשי הערים אשר תתנו ללוים--מקיר העיר וחוצה אלף אמה סביב

⁵ה ומדתם מחוץ לעיר את פאת קדמה אלפים באמה ואת פאת נגב אלפים באמה ואת פאת ים אלפים באמה ואת פאת צפון אלפים באמה--והעיר בתוך זה יהיה להם מגרשי הערים

⁶ו ואת הערים אשר תתנו ללוים--את שש ערי המקלט אשר תתנו לנס שמה הרצח ועליהם תתנו ארבעים ושתים עיר

⁷ז כל הערים אשר תתנו ללוים--ארבעים ושמנה עיר אתהן ואת מגרשיהן

⁸ח והערים אשר תתנו מאחזת בני ישראל--מאת הרב תרבו ומאת המעט תמעיטו איש כפי נחלתו אשר ינחלו יתן מעריו ללוים {פ}

⁹ט וידבר יהוה אל משה לאמר

¹⁰י דבר אל בני ישראל ואמרת אלהם כי אתם עברים את הירדן ארצה כנען

¹¹יא והקריתם לכם ערים ערי מקלט תהיינה לכם ונס שמה רצח מכה נפש בשגגה

¹²יב והיו לכם הערים למקלט מגאל ולא ימות הרצח עד עמדו לפני העדה למשפט

¹³יג והערים אשר תתנו--שש ערי מקלט תהיינה לכם

¹⁴יד את שלש הערים תתנו מעבר לירדן ואת שלש הערים תתנו בארץ כנען ערי מקלט תהיינה

¹⁵טו לבני ישראל ולגר ולתושב בתוכם תהיינה שש הערים האלה למקלט--לנוס שמה כל מכה נפש בשגגה

¹⁶טז ואם בכלי ברזל הכהו וימת רצח הוא מות יומת הרצח

¹⁷יז ואם באבן יד אשר ימות בה הכהו וימת--רצח הוא מות יומת הרצח

¹⁸יח או בכלי עץ יד אשר ימות בו הכהו וימת--רצח הוא מות יומת הרצח

¹⁹יט גאל הדם הוא ימית את הרצח בפגעו בו הוא ימתנו

²⁰כ ואם בשנאה יהדפנו או השליך עליו בצדיה וימת

²¹כא או באיבה הכהו בידו וימת--מות יומת המכה רצח הוא גאל הדם ימית את הרצח--בפגעו בו

²²כב ואם בפתע בלא איבה הדפו או השליך עליו כל כלי בלא צדיה

²³כג או בכל אבן אשר ימות בה בלא ראות ויפל עליו וימת--והוא לא אויב לו ולא מבקש רעתו

²⁴כד ושפטו העדה בין המכה ובין גאל הדם--על המשפטים האלה

²⁵כה והצילו העדה את הרצח מיד גאל הדם והשיבו אתו העדה אל עיר מקלטו אשר נס שמה וישב בה עד מות הכהן הגדל אשר משח אתו בשמן הקדש

²⁶כו ואם יצא יצא הרצח את גבול עיר מקלטו אשר ינוס שמה

²⁷כז ומצא אתו גאל הדם מחוץ לגבול עיר מקלטו ורצח גאל הדם את הרצח--אין לו דם

²⁸כח כי בעיר מקלטו ישב עד מות הכהן הגדל ואחרי מות הכהן הגדל--ישוב הרצח אל ארץ אחזתו

²⁹כט והיו אלה לכם לחקת משפט לדרתיכם בכל מושבתיכם

³⁰ל כל מכה נפש--לפי עדים ירצח את הרצח ועד אחד לא יענה בנפש למות

³¹לא ולא תקחו כפר לנפש רצח אשר הוא רשע למות כי מות יומת

³²לב ולא תקחו כפר לנוס אל עיר מקלטו לשוב לשבת בארץ עד מות הכהן

³³לג ולא תחניפו את הארץ אשר אתם בה כי הדם הוא יחניף את הארץ ולארץ לא יכפר לדם אשר שפך בה כי אם בדם שפכו

³⁴לד ולא תטמא את הארץ אשר אתם ישבים בה--אשר אני שכן בתוכה כי אני יהוה--שכן בתוך בני ישראל {פ}