Read כֶּתֶר אֲרָם צוֹבָא - Tanah Aleppo Codex במדבר 5 Bible Online

במדבר 5 - כֶּתֶר אֲרָם צוֹבָא - Tanah Aleppo Codex bible

במדבר 5

¹א וידבר יהוה אל משה לאמר

²ב צו את בני ישראל וישלחו מן המחנה כל צרוע וכל זב וכל טמא לנפש

³ג מזכר עד נקבה תשלחו אל מחוץ למחנה תשלחום ולא יטמאו את מחניהם אשר אני שכן בתוכם

⁴ד ויעשו כן בני ישראל וישלחו אותם אל מחוץ למחנה כאשר דבר יהוה אל משה כן עשו בני ישראל {פ}

⁵ה וידבר יהוה אל משה לאמר

⁶ו דבר אל בני ישראל איש או אשה כי יעשו מכל חטאת האדם למעל מעל ביהוה ואשמה הנפש ההוא

⁷ז והתודו את חטאתם אשר עשו והשיב את אשמו בראשו וחמישתו יסף עליו ונתן לאשר אשם לו

⁸ח ואם אין לאיש גאל להשיב האשם אליו--האשם המושב ליהוה לכהן מלבד איל הכפרים אשר יכפר בו עליו

⁹ט וכל תרומה לכל קדשי בני ישראל אשר יקריבו לכהן--לו יהיה

¹⁰י ואיש את קדשיו לו יהיו איש אשר יתן לכהן לו יהיה {פ}

¹¹יא וידבר יהוה אל משה לאמר

¹²יב דבר אל בני ישראל ואמרת אלהם איש איש כי תשטה אשתו ומעלה בו מעל

¹³יג ושכב איש אתה שכבת זרע ונעלם מעיני אישה ונסתרה והיא נטמאה ועד אין בה והוא לא נתפשה

¹⁴יד ועבר עליו רוח קנאה וקנא את אשתו והוא נטמאה או עבר עליו רוח קנאה וקנא את אשתו והיא לא נטמאה

¹⁵טו והביא האיש את אשתו אל הכהן והביא את קרבנה עליה עשירת האיפה קמח שערים לא יצק עליו שמן ולא יתן עליו לבנה--כי מנחת קנאת הוא מנחת זכרון מזכרת עון

¹⁶טז והקריב אתה הכהן והעמדה לפני יהוה

¹⁷יז ולקח הכהן מים קדשים בכלי חרש ומן העפר אשר יהיה בקרקע המשכן יקח הכהן ונתן אל המים

¹⁸יח והעמיד הכהן את האשה לפני יהוה ופרע את ראש האשה ונתן על כפיה את מנחת הזכרון מנחת קנאת הוא וביד הכהן יהיו מי המרים המאררים

¹⁹יט והשביע אתה הכהן ואמר אל האשה אם לא שכב איש אתך ואם לא שטית טמאה תחת אישך--הנקי ממי המרים המאררים האלה

²⁰כ ואת כי שטית תחת אישך--וכי נטמאת ויתן איש בך את שכבתו מבלעדי אישך

²¹כא והשביע הכהן את האשה בשבעת האלה ואמר הכהן לאשה יתן יהוה אותך לאלה ולשבעה בתוך עמך--בתת יהוה את ירכך נפלת ואת בטנך צבה

²²כב ובאו המים המאררים האלה במעיך לצבות בטן ולנפל ירך ואמרה האשה אמן אמן

²³כג וכתב את האלת האלה הכהן--בספר ומחה אל מי המרים

²⁴כד והשקה את האשה את מי המרים המאררים ובאו בה המים המאררים למרים

²⁵כה ולקח הכהן מיד האשה את מנחת הקנאת והניף את המנחה לפני יהוה והקריב אתה אל המזבח

²⁶כו וקמץ הכהן מן המנחה את אזכרתה והקטיר המזבחה ואחר ישקה את האשה את המים

²⁷כז והשקה את המים והיתה אם נטמאה ותמעל מעל באישה--ובאו בה המים המאררים למרים וצבתה בטנה ונפלה ירכה והיתה האשה לאלה בקרב עמה

²⁸כח ואם לא נטמאה האשה וטהרה הוא--ונקתה ונזרעה זרע

²⁹כט זאת תורת הקנאת אשר תשטה אשה תחת אישה ונטמאה

³⁰ל או איש אשר תעבר עליו רוח קנאה--וקנא את אשתו והעמיד את האשה לפני יהוה ועשה לה הכהן את כל התורה הזאת

³¹לא ונקה האיש מעון והאשה ההוא תשא את עונה {פ}