Read כֶּתֶר אֲרָם צוֹבָא - Tanah Aleppo Codex במדבר 6 Bible Online

במדבר 6 - כֶּתֶר אֲרָם צוֹבָא - Tanah Aleppo Codex bible

במדבר 6

¹א וידבר יהוה אל משה לאמר

²ב דבר אל בני ישראל ואמרת אלהם איש או אשה כי יפלא לנדר נדר נזיר--להזיר ליהוה

³ג מיין ושכר יזיר חמץ יין וחמץ שכר לא ישתה וכל משרת ענבים לא ישתה וענבים לחים ויבשים לא יאכל

⁴ד כל ימי נזרו מכל אשר יעשה מגפן היין מחרצנים ועד זג--לא יאכל

⁵ה כל ימי נדר נזרו תער לא יעבר על ראשו עד מלאת הימם אשר יזיר ליהוה קדש יהיה--גדל פרע שער ראשו

⁶ו כל ימי הזירו ליהוה על נפש מת לא יבא

⁷ז לאביו ולאמו לאחיו ולאחתו--לא יטמא להם במתם כי נזר אלהיו על ראשו

⁸ח כל ימי נזרו קדש הוא ליהוה

⁹ט וכי ימות מת עליו בפתע פתאם וטמא ראש נזרו--וגלח ראשו ביום טהרתו ביום השביעי יגלחנו

¹⁰י וביום השמיני יבא שתי תרים או שני בני יונה אל הכהן--אל פתח אהל מועד

¹¹יא ועשה הכהן אחד לחטאת ואחד לעלה וכפר עליו מאשר חטא על הנפש וקדש את ראשו ביום ההוא

¹²יב והזיר ליהוה את ימי נזרו והביא כבש בן שנתו לאשם והימים הראשנים יפלו כי טמא נזרו

¹³יג וזאת תורת הנזיר ביום מלאת ימי נזרו יביא אתו אל פתח אהל מועד

¹⁴יד והקריב את קרבנו ליהוה כבש בן שנתו תמים אחד לעלה וכבשה אחת בת שנתה תמימה לחטאת ואיל אחד תמים לשלמים

¹⁵טו וסל מצות סלת חלת בלולת בשמן ורקיקי מצות משחים בשמן ומנחתם ונסכיהם

¹⁶טז והקריב הכהן לפני יהוה ועשה את חטאתו ואת עלתו

¹⁷יז ואת האיל יעשה זבח שלמים ליהוה על סל המצות ועשה הכהן את מנחתו ואת נסכו

¹⁸יח וגלח הנזיר פתח אהל מועד--את ראש נזרו ולקח את שער ראש נזרו ונתן על האש אשר תחת זבח השלמים

¹⁹יט ולקח הכהן את הזרע בשלה מן האיל וחלת מצה אחת מן הסל ורקיק מצה אחד ונתן על כפי הנזיר אחר התגלחו את נזרו

²⁰כ והניף אותם הכהן תנופה לפני יהוה--קדש הוא לכהן על חזה התנופה ועל שוק התרומה ואחר ישתה הנזיר יין

²¹כא זאת תורת הנזיר אשר ידר קרבנו ליהוה על נזרו מלבד אשר תשיג ידו כפי נדרו אשר ידר--כן יעשה על תורת נזרו {פ}

²²כב וידבר יהוה אל משה לאמר

²³כג דבר אל אהרן ואל בניו לאמר כה תברכו את בני ישראל אמור להם {ס}

²⁴כד יברכך יהוה וישמרך {ס}

²⁵כה יאר יהוה פניו אליך ויחנך {ס}

²⁶כו ישא יהוה פניו אליך וישם לך שלום {ס}

²⁷כז ושמו את שמי על בני ישראל ואני אברכם {ס}